Qeyri-neft sahəsinin mühüm qollarından biri kimi son illərdə ölkədə turizmin kifayət qədər intensiv inkişaf etməsi müşahidə olunmaqdadır. İndi həm ölkəyə gələn turistlərin sayı artır, həm də turizmdən gələn gəlirlər çoxalır. Yeri gəlmişkən qeyd edək ki, ötən illə müqayisədə bu ilin ötən dövründə Azərbaycana gələn turistlərin sayında 20 faiz artım müşahidə edilib.
Milli Turizm Təbliğat Bürosunun təmsilçisi Kənan Quluzadənin sözlərinə görə, 2016-cı illə müqayisədə bu il artım tempi daha yüksək olub. Belə ki, 2016-cı ildə turistlərin sayında 12 faizə qədər artım olmuşdusa, bu ilin ötən dövründə qeyd olunan artım 20 faiz təşkil edib: “Qarşıya qoyulan plana əsasən, 2020-ci ildə Azərbaycana gələn turistlərin sayı 4.5 milyon nəfər olmalıdır, lakin turistlərin sayında inkişaf tempinə əsasən deyə bilərik ki, bu rəqəmə daha tez nail olunacaq. Azərbaycana gələn turistlərin coğrafiyasında da genişlənmə var və bütün istiqamətlərdən ölkəyə gələn turistlərin sayında artım müşahidə edilir”.
K.Quluzadə əlavə edib ki, Azərbaycanda keçirilən beynəlxalq tədbirlər çərçivəsində ölkəmizin turizm imkanları barədə təbliğat aparılır. Növbəti ildən xaricdə sözügedən mövzularda sərgilərin keçirilməsi planlaşdırılır. O hesab edir ki, yaxın 15 ildə Azərbaycana turizmdən gələn gəlirlər karbohidrogen sahəsindən gələn gəlirlə eyni olacaq.
Hələlik isə Azərbaycanda əsas məqsədlərdən biri ölkəyə daha çox sayda turist axınını təmin etməkdir. Yuxarıda qeyd olunduğu kimi, artıq bu ilin ötən dövrü ərzində qeyd olunan istiqamətdə mühüm addımlar atılıb. Belə ki, cari ilin 10 ayı ərzində ölkəmizə gələn xarici vətəndaşların sayı 2 milyon 276 min nəfər olub. Halbuki, 2016-cı ilin 10 ayında Azərbaycana gələn xarici vətəndaşların sayı 1 milyon 894 min nəfər təşkil edib. Cari ilin 10 ayında ölkəmizə gələn xarici vətəndaşların ümumi sayında Rusiya, Gürcüstan, İran və Türkiyə vətəndaşlarının xüsusi çəkisi daha çox olub. Ötən ilin müvafiq dövrü ilə müqayisədə bu il əsas artım tempi göstərən ölkələr İran, Birləşmiş Ərəb Əmirlikləri, Rusiya olub. Ümumiyyətlə, Rusiya vətəndaşları Azərbaycana gələn xarici turistlərin sayına görə liderdir. Bu ilin ilk 9 ayı ərzində Azərbaycan şimal qonşusundan 728 min nəfəri qəbul edib ki, bu da bütün xarici turislərin 32%-i deməkdir. Rusiyanın turoperatorları bildirir ki, Azərbaycana səfər edən turistlər bu ölkəyə daha çox səyyah kimi, qismən isə ezamiyyət və işgüzar çərçivədə gedir. Bununla yanaşı, Azərbaycan Rusiya vətəndaşlarının klassik turla da getdiyi populyar ölkələrdən biridir və bu ölkəyə axın getdikcə artır. Rusiyanın milli turoperatonunun təmsilçilərindən biri bu xüsusda TASS agentlyinə bildirib: “Rusiya vətəndaşları Azərbaycanda təşkil olunmuş istirahətə üstünlük verir. Onlar otel bron edilməsi, aviabilet və sığorta alınması məsələləri ilə məşğul olmaq istəmir. Üstəlik, turpaket əldə etməklə səyahət fərdi səyahətdən ucuz başa gəlir”. Bundan başqa, onun sözlərinə görə, Rusiya turistləri Azərbaycanda daha çox çimərlikləri ilə məşhur Novxanı, Şıx və Bilgəh kimi kurort qəsəbələrinə maraq göstərir. Bu yerlərdə 1 həftə dincəlmək qidalanma da daxil olmaqla turistlərə 35 min rubla və ya təxminən 1000 manata başa gəlir. Bununla yanaşı, dünyada analoqu olmayan Naftalan nefti də qonşu ölkənin turistlərinin marağındadır. Qış mövsümündə, Yeni İl ərfəsində isə Rusiya vətəndaşları Bakıya gəlməyə, eləcə də Şahdağ Qış-Yay Turizm Kompleksinə getməyə üstünlük verir.
Ekspertlər hesab edir ki, turizm sektoru üzrə ən yüksək səviyyədə və müasir standartlara uyğun qurulmuş infrastruktur bu sahənin inkişafı üçün münbit şərait yaradıb. Son illərdə bir çox beynəlxalq səviyyəli tədbirlərin ölkəmizdə keçirilməsi xarici vətəndaşların Azərbaycana marağını daha da artırıb. Belə vəziyyətdə turizm sektorunun Azərbaycanda daha dinamik inkişafı gözlənir. İlkin proqnozlara görə, bu gedişlə gələn il turizm sektoru üzrə gəlirlərin 6,6%, növbəti üç ildə isə orta hesabla 6%-dən çox artacağı proqnozlaşdırılır. Amma artımın gözlənildyindən çox olması da istisna edilmir. Bunu şərtləndirən səbəblərdən biri odur ki, artıq ölkəmizə təkcə yayda yox, qışda, elə ilin digər fəsillərində də üz tutan turistlərin sayı artır. Son araşdırmalar göstərir ki, istər yay, istərsə də qış turizmi mövsümündə Azərbaycan artıq turistlərin üz tutduğu əsas məknlardan sayılır. Xüsusən də qışda Rusiya, Gürcüstan, İran, Türkiyə və ərəb ölkələrindən ciddi axın müşahidə olunur. Düzdür, dünya praktikasında da yay turizm mövsümü qış turizm mövsümü ilə müqayisədə daha güclü olur. Yayda istənilən ölkəyə, o cümlədən Azərbaycana da daha çox turist gəlir. Amma qış turizmi də ölkəmizdə artıq intensiv inkişaf edir, bu xüsusda mövsüm üçün indidən zəruri hazırlıq işləri görülüb. Belə vəziyyətdə də ölkəyə daha çox turistin gəlişi gözlənir.
Nahid SALAYEV
