Müslüm İbrahimov: “Ticarət bayramının keçirilməsi istehsalçılar üçün stimullaşdırıcı rol oynayır”
Bakı şəhəri bu ay İkini Şopinq Festivalı ilə qonaqların sevimli məkanına çevrilib. Şopinqsevərlər məmnuniyyətlə paytaxt ərazisində fəaliyyət göstərən ticarət mərkəzləri və dükanlardan alış-veriş edirlər. Bəllidir ki, bu festivallarda iştirak üçün ölkə ərazisində fəalliyyət göstərən məşhur dünya brendlərinin mağazaları seçilib.
Bakushopfest.com saytına müsahibə verən Misirin Azərbaycandakı Səfirliyinin Mədəniyyət və Təhsil Əlaqələri Mərkəzinin direktoru Əhməd Sami əl-Aydi bildirib ki, Bakı Şopinq Festivalı, heç şübhəsiz, dünyanın bir çox ölkəsindən, xüsusilə qonşu dövlətlərdən Azərbaycana turistlərin cəlb edilməsi üçün mühüm fürsətdir. Bu festival yalnız əcnəbi vətəndaşları və turistləri cəlb etmək deyil, həm də ölkə vətəndaşlarını alış-verişə həvəsləndirmək, yerli məhsulların istehsalını artırmaq imkanı yaradır: “Təsadüfi deyil ki, I Bakı Şopinq Festivalının əldə etdiyi böyük uğurdan sonra ikinci festivala qoşulan şirkət və brendlərin sayı xeyli artıb. Festivalın gedişində alış-veriş mərkəzlərinə böyük axının şahidi oluruq. Şübhəsiz ki, bu təcrübə yüksək qiymətləndirilməlidir və ənənənin davamlı olmasını arzu edirik”.
Ticarət bayramının yerli istehsala təsir edəcəyi fikri ilə ekspertlər də razıdır.
Azərbaycan Dövlət İqtisad Universitetinin (UNEC) İqtisadiyyat kafedrasının müdiri, iqtisad elmləri doktoru Müslüm İbrahimov “Bakı-Xəbər”ə açıqlamasında qeyd etdi ki, Bakı Şopinq Festivalının ölkəmizdə keçirilməsi olduqca mühüm məsələdir: “Ticarət Festivalı tək xarici turistlər üçün deyil, eyni zamanda yerli vətəndaşların diqqətindədir. Bu cür tədbirlər istehsalçılar üçün stimullaşdırıcı rol oynayır. Şopinq festivallarında aşağı qiymətə məhsulların təqdim olunması alıcıların marağına səbəb olur. Həmçinin, məhsulların qiymətində endirim olması səbəbindən şirkətlər marketinq tədqiqatını həyata keçirməyə məcbur olurlar”.
Həmsöhbətimizin sözlərinə görə, Şopinq Festivalının müsbət tərəflərindən biri də yerli istehsalın artmasına təkan verməsidir. Yerli istehsalın artması qeyri-neft sektorunun inkişafı deməkdir.
Günel CƏLİLOVA
