Pərviz Heydərov: “Əlverişli biznes mühitinin formalaşması üçün kiçik və orta sahibkarlara vergi güzəşti tətbiq olunmalıdır”
Kiçik və orta sahibkarlıq nümayəndələrinə vergi güzəştlərinin tətbiq olunması imkanı nəzərdən keçirilir. Bu barədə məlumat yerli mətbuatda yer alıb. Qeyd olunur ki, güzəştlər əsasən mənfəət və gəlir vergilərinə şamil olunacaq: “Yeni güzəştlər bu vergilərdən qismən və müəyyən müddətə azad edilməni nəzərdə tutur. Hələlik kiçik və orta biznes subyektlərinin vergilərdən tam azad olunması barədə söhbət getmir”.
Kiçik və orta sahibkarlıqla məşğul olanlara vergi güzəştinin tətbiq olunması barədə fikir bildirən İqtisadiyyat Nazirliyi İqtisadi İslahatlar Elmi-Tədqiqat İnstitutunun aparıcı elmi işçisi Pərviz Heydərov "Bakı-Xəbər"ə açıqlamasında qeyd etdi ki, son iki ildə Azərbaycanda ümumdaxili məhsulun azalması prosesi müşahidə olunur: “Bu da dünya bazarında neftin qiymətində dəyişiklik olması ilə bağlıdır. Etiraf edək ki, son zamanlar neftin qiymətində stabillik yaranıb”.
Həmsöhbətimizin sözlərinə görə, ötən il ölkə başçısı İlham Əliyev tərəfindən qeyri-neft sektorunun inkişafı ilə bağlı bir sıra normativ sənədlər imzalanıb, “Strateji Yol Xəritəsi” qəbul olunub. Nəticə olaraq bu il qeyri-neft sektorunda sevindirici göstəricilər qeydə alınır: “Onu da qeyd edim ki, digər inkişaf etmiş ölkələrin təcrübəsinə nəzər salsaq görərik ki, qeyri-neft sektoru dedikdə onun əsas aparıcı hissəsini kiçik və orta sahibkarlıq təşkil edir. Kiçik və orta sahibkarlığın inkişafı ilə bağlı xeyli stimullaşdırıcı tədbirlər görülür. Bundan əlavə, 2015-ci il noyabrın 1-dən sahibkarların yoxlanılması qanunvericilik yolu ilə qadağan olunub. Sahibkarlığın yoxlanılması prosedurunun 2021-ci ilə qədər dayandırılması kimi görülən işlər bu sahəyə öz müsbət təsirini göstərəcək. Təbii ki, bu addımlar müsbət qiymətləndirilməlidir”.
Həmsöhbətimiz onu da vurğuladı ki, kiçik və orta sahibkarlığın inkişafı müvafiq biznes şəraitinin olmasını tələb edir. Bunun üçün isə vergi tamamilə endirilməlidir: “Şərt o deyil ki, sahibkarların yoxlanılması prosesi dayandırılsın. Sahibkarların yoxlanılması prosesi məhz onların vergidən yayınması elementi təşkil edir. Bu səbəbdən də gələcəkdə də qanunvericilik yolu ilə sahibkarların müdafiə olunmasını istəmiriksə, onda biz iqtisadiyyatın özündə elə bir sistemin formalaşmasına nail olmalıyıq ki, onlar özləri yoxlamadan çəkinməsinlər. Bunun üçün isə sahibkarlarda vergidən yayınma marağı olmamalıdır”.
P.Heydərov hesab edir ki, əlverişli biznes mühitinin formalaşması üçün kiçik və orta sahibkarlara vergi güzəşti tətbiq olunmalıdır.
Günel CƏLİLOVA
