Rəşad Həsənov: “Ərəb ölkələri ilə Azərbaycan arasında birgə investisiya fondunun yaradılmasında məqsəd bu ölkələrdən daha çox sərmayənin ölkəyə cəlb edilməsidir”
Ötən həftə Azərbaycan - Körfəz Ərəb Dövlətlərinin Əməkdaşlıq Şurasına (KƏŞ) üzv ölkələri biznes forumu keçirilib. Körfəz Ərəb Dövlətlərinin Əməkdaşlıq Şurası Azərbaycan iqtisadiyyatına təqribən 1,3 milyard dollar sərmayə yatırıb. Bunu Azərbaycan - Körfəz Əməkdaşlıq Şurasının biznes-forumunda iqtisadiyyat naziri Şahin Mustafayev deyib. Onun sözlərinə görə, bu investisiyalar əsasən Birləşmiş Ərəb Əmirlikləri, Səudiyyə Ərəbistanı və Bəhreyn tərəfindən qoyulub. Hazırda Azərbaycanda Küveyt, Bəhreyn, Qətər və Səudiyyə Ərəbistanı kapitallı 280 şirkət fəaliyyət göstərir.
Azərbaycan isə, öz növbəsində, Körfəz Əməkdaşlıq Şurasına üzv ölkələrin iqtisadiyyatına təxminən 300 milyon dollar sərmayə yatırıb. Azərbaycan və Körfəz Əməkdaşlıq Şurası ölkələri arasında əmtəə dövriyyəsi də son illərdə nisbətən artaraq cari ilin 8 ayı ərzində 40 milyon dolları keçib. 2016-cı ildə Azərbaycan və körfəz ölkələri arasında ticarət dövriyyəsi 86 mln. dollar, 2017-ci ilin 8 ayı ərzində isə 40 mln. dollardan çox olub. Nazir vurğulayıb ki, Azərbaycanda fəaliyyət göstərən körfəz ölkələri şirkətlərinin sayının artırılması, ticarət əlaqələrinin genişləndirilməsi üçün imkanlar genişdir.
Nazir bildirib ki, Azərbaycanla Şura ölkələri arasında iqtisadi əlaqələr potensialdan aşağıdır. Azərbaycanın sabit ölkə olduğunu qeyd edən nazir körfəz ölkələrini Azərbaycanın müxtəlif sektorlarına investisiya qoymağa çağırıb. Bununla yanaşı, nazir Azərbaycanla ərəb ölkələrinin birgə investisiya fondunun yaradıla biləcəyini də qeyd edib. Bildirib ki, hazırda Qətərlə investisiya fondunun yaradılması ilə bağlı danışıqlar aparılır.
Bütövlükdə, belə bir investisiya fondunun yaradılmasının nə kimi əhəmiyyəti var? Bunun iki tərəf arasında sərmayə mübadiləsinin təmin olunmasında rolu nədən ibarət olacaq?
Məsələyə münasibət bildirən iqtisadçı-ekspert Rəşad Həsənovun sözlərinə görə, ümumilikdə, son illər hökumət ərəb ölkələri ilə əməkdaşlığın genişləndirilməsində maraqlıdır: “Məsələ ondadır ki, bu ölkələrdə böyük investisiya potensialı var. Xüsusilə də Qətər bu işdə çox fəaldır. Türkiyədə bir sıra investisiya layihələri var. Ümumilikdə, bu ölkənin böyük investisiya potensialı var. Ərəb ölkələri ilə Azərbaycan arasında birgə investisiya fondunun yaradılmasında məqsəd bu ölkələrdən daha çox sərmayənin ölkəyə cəlb edilməsidir. Çünki hazırda Azərbaycan hökuməti ölkədən investisiyanın çıxmasında deyil, sərmayənin ölkəyə daxil olmasında maraqlıdır. Bu baxımdan da körfəz ölkələrinin bu işə cəlb edilməsi mümkündür ki, növbəti dövrlərdə ölkə iqtisadiyyatında sözügedən sərmayənin həcmini artırsın. Ancaq bir məsələni də diqqətdə saxlamaq lazımdır ki, ərəb ölkələrindən Azərbaycana investisiyanın cəlb edilməsi daha çox maliyyə vasaiti şəklində ola bilər. Ancaq bundan fərqli olaraq, inkişaf etmiş ölkələrdən cəlb edilən investisiyalar eyni zamanda texnologiyanın, innovasiyanın da ölkəyə gəlməsinə şərait yaradır. Bu baxımdan investisiyanın şaxələndirilməsi istiqamətində də işlərin görülməsinə ehtiyac var. Biz çalışmalıyıq ki, Azərbaycana daha çox xarici sərmayə gəlsin və bu əsasən qeyri-neft sektorunun inkişafına yönəlsin. Vacib faktorlardan biri də budur. O üzdən, biz bu istiqamətdə səylərimizi artırmalıyıq. Ölkədə elə sərmayə, işgüzar mühit olmalıdır ki, xarici sərmayədarlar Azərbaycana investisiya qoymaqda maraqlı olsunlar”.
Vidadi ORDAHALLI
