Vüqar Bayramov: “Hesab edirəm ki, bu, ölkə iqtisadiyyatı üçün yaxşı perspektiv vəd edir”
Türkiyəyə birbaşa xarici investisiya bu ilin ilk yarısında keçən ilin eyni dövrü ilə müqayisədə 50,1 faiz artaraq 4 milyard 108 milyon dollara çatıb. Belə ki, 2016-cı ilin ilk yarısında isə bu rəqəm 2 milyard 736 milyon dollar olub. Bundan başqa, Türkiyəyə yatırılan sərmayələr bu ilin 8 ayı ərzində 28,8 faiz olmaqla 4,9 milyard dollar yüksəlib.
Diqqətçəkən məqamlardan biri ondan ibarətdir ki, bu ölkəyə ən çox sərmayə qoyan ölkələr içində Azərbaycan ilk üçlükdə yer alıb. Məsələ ondadır ki, Türkiyəyə qarşı edilən siyasi təzyiqlərə baxmayaraq, xarici şirkətlər Türkiyəyə etibar edərək sərmayələrini qoymaqda və işlərini qurmaqda davam edirlər. Müşahidələr göstərir ki, belə yatırımların 79 faizini avropalı şirkətlər həyata keçirib. Xüsusilə də Almaniya və Hollandiya kimi ölkələrin şirkətlərinin artan marağı diqqət çəkməkdədir.
Siyahıda Hollandiya 1 milyard 501 milyon dollar, İspaniya 1 milyard 46 milyon dollar, Azərbaycan 355 milyon dollar, Avstriya 308 milyon dollarla yer almaqdadır. Görünən odur ki, Azərbaycan qardaş ölkəyə böyük sərmayələr yatırmaqdadır və bu, yüksələn xətt üzrə inkişaf edir. Bununla yanaşı, Azərbaycan Türkiyə iqtisadiyyatının bir sıra sahələrinə investisiya qoyur. Bu da qonşu ölkənin sərmayə cəlbi üçün münasib imkanlara malik olmasının göstəricisidir. Eyni zamanda, Azərbaycanın bu yöndə güclü imkanlara malik olmasının göstəricisidir.
Sözügedən məsələni dəyərləndirən iqtisadçı-ekspert Vüqar Bayramovun fikrincə, son illər azərbaycanlı iş adamları və dövlət şirkətləri xaricə 10 milyard dollardan artıq investisiya yönəldib: “Görünən odur ki, Azərbaycan artıq investisiya qoyulan ölkədən investisiya qoyan ölkəyə çevrilib. Bu gün nəinki qonşu ölkələrə, həmçinin, Mərkəzi-şərqi Avropaya, Amerikaya investisiya yatırır. Hesab edirəm ki, bu, ölkə iqtisadiyyatı üçün yaxşı perspektiv vəd edir. Ona görə ki, qoyulan sərmayələr öz bəhrəsin verəcək və Azərbaycan bundan qazanacaq. Bu investisiyaların ümumən çoxu Türkiyə, digər hissəsi Gürcüstana və Mərkəzi-şərqi Avropa daxil olmaqla, digər ölkələrin iqtisadiyyatına yatırılıb. İllər öncə Azərbaycanın Türkiyə sərmayəsinə ehtiyacı var idi, bu gün isə bu ölkəyə ən çox yatırım edən ölkələrdən biridir. Yaxın gələcəkdə isə Türkiyəyə qoyulan investisiya məbləğinin iki dəfə artacağı gözlənir. Azərbaycan Mərkəzi-şərqi Avropa ölkələrində daha çox sənaye sektoruna, enerji daşıyıcılarının istehsalı və yayımına, turizmə, ABŞ, Honq-Konq və Rusiyada daşınmaz əmlak sektoruna sərmayələr qoyur. Bütövlükdə, Azərbaycanın xarici investisiyalarının strukturunun şaxələnməsi dünyada durğunluq və qlobal böhranlar baş verdiyi bir zamanda ölkənin dövlət büdcəsinə daha dayanıqlı və stabil gəlirlərin daxil olmasını təmin edir. Hesab edirəm ki, Azərbaycanın bu ilin 8 ayında Türkiyəyə qoyulan xarici sərmayədə ilk üçlükdə yer alması yaxşı göstəricidir”.
Vidadi ORDAHALLI
