Bu günlərdə Ukraynanın paytaxtı Kiyev şəhərində Avropadaxili Vergi Administrasiyaları Təşkilatının (IOTA) 21-ci Baş Assambleyasının "Dağıdıcı tendensiyalar və yeni biznes modelləri: 21-ci əsrin vergi administrasiyaları üçün çağırışlar və nəticələr" mövzusunda konfransı keçirilib.
Azərbaycan Vergilər Nazirliyinin Beynəlxalq əməkdaşlıq və maliyyə institutlarında vergi monitorinqi departamentinin baş direktoru Zaur Fətizadənin rəhbərlik etdiyi nümayəndə heyəti tədbirdə iştirak edib.
Ukraynanın Dövlət Fiskal Xidməti rəhbərinin müavini, IOTA-nın 2016-2017-ci illər üzrə prezidenti Miroslav Prodan tədbir iştirakçılarını salamlayaraq, ölkəsinin quruma rəhbərlik etdiyi dövr ərzində qarşıya qoyulmuş əsas məqsədlər və əldə olunmuş nailiyyətlər barədə iştirakçılara məlumat verib.
Sonra 2017-2018-ci illər üçün təşkilata rəhbər şəxsin seçilməsi üzrə səsvermə keçirilib. Slovakiya Respublikasının Maliyyə Direktorluğunun rəhbəri Frantişek İmrecze IOTA-nın yeni prezidenti seçilib. Konfransda, həmçinin, 22-ci Baş Assambleyasının 2018-ci ildə Slovakiyada keçirilməsi qərara alınıb. IOTA-nın baş katibi Migel Pinto təşkilatın 2018-ci il üzrə Tədbirlər Planını və büdcəsini iştirakçılara təqdim edib. Bildirib ki, növbəti il üçün təşkilatın büdcəsi 1.091,200 avro təşkil edəcək. IOTA-nın Katibliyi üzv dövlətlərin ehtiyaclarını və tələbatlarını nəzərə alaraq, bu müddət ərzində 4 layihə həyata keçirməyi planlaşdırır. Bu layihələr çərçivəsində ƏDV, borcların idarə edilməsi, BEPS, avtomatik məlumat mübadiləsi, təlim və inkişaf mövzusunda tədbirlər keçiriləcək. Konfransda 22-ci Baş Assambleyanın konfransının Azərbaycan, Avstriya, Bolqarıstan, Finlandiya, Macarıstan, İspaniya, İsveçrə, İrlandiya və Litvanın təklifləri əsasında hazırlanmış "Rəqəmsallaşdırmanın vergi administrasiyalarının transformasiyasına təsiri" mövzusu üzrə keçirilməsi yekdilliklə qəbul olunub.
Tədbirin ikinci günündə IOTA-nın yeni strategiyasının hazırlanması üzrə işçi qrupun üzvlərinin müəyyənləşdirilməsi müzakirə olunub və Azərbaycan Respublikası Vergilər Nazirliyinin Beynəlxalq əməkdaşlıq və maliyyə institutlarında vergi monitorinqi departamentinin baş direktorunun müavini, Beynəlxalq əməkdaşlıq idarəsinin direktoru Orxan Musayev qrupa namizəd seçilib. Sonra OECD-nin nümayəndəsi Devid Bredberi "Vergi və rəqəmsallaşdırma. İmkanlar, çağırışlar və G20 gündəmi", Avropa Komissiyasının Vergi və Gömrük İttifaqı Baş Direktorluğunun nümayəndəsi Maria Tereza Fabreqas "Bitkoin texnologiyası vergi administrasiyaları üçün nə vəd edir", Amerikadaxili Vergi Administrasiyaları Mərkəzinin (CIAT) icraçı katibi Marsio Verdi "Təlim və insan istedadının inkişafı" mövzusunda təqdimatlarla çıxış ediblər. Baş Assambleyanın sessiyalarında iqtisadiyyatda verginin təsirləri və inzibati imkanlar, əməletmə modeli və digər mövzular ətrafında çıxışlar dinlənib.
Namiq QULİYEV
