Ruslan Atakişiyev: "Həmin o istehsal sektorlarının Azərbaycana ötürülməsi lazımdır"
Türkiyə baş nazirinin müavini Nurəddin Canikli türkiyəli sahibkarları Azərbaycana investisiya yatırmağa çağırıb. O qeyd edib ki, Türkiyə və Azərbaycan arasında sıx münasibətləri nəzərə almaqla Türkiyə investorlarının Azərbaycanda özəlləşdirmə prosesində iştirakı strateji əhəmiyyət daşıya bilər.
Onun fikrincə, informasiya və telekommunikasiya, maliyyə və sığorta, alkoqolsuz içkilər və tütün məmulatları, eləcə də sənaye və tikinti sahələri Azərbaycanda Türkiyə investorları üçün daha çox maraq doğuran sahələrdir: "Dünya bazarlarında neftin qiymətinin azalması fonunda Azərbaycan hökuməti diqqətini əsasən qeyri-neft sektorunun inkişaf etdirilməsi və bu sahəyə daha çox sərmayə yatırılmasına yönəldib".
N.Canikli bildirib ki, kənd təsərrüfatı, heyvandarlıq, kimya sənayesi, turizm sahələri türkiyəli investorlar üçün maraqlıdır: "Bu sahədə türkiyəli investorların Azərbaycanla təcrübə mübadiləsi aparmaq imkanları da genişdir. Qardaş və dost ölkələr olan Türkiyə və Azərbaycan şirkətlərin, eləcə də birgə investisiyaların sayını artırmaq imkanına malikdir. Türkiyə sərmayəçiləri Azərbaycanla əməkdaşlığı kifayət qədər geniş aspektdə nəzərdən keçirir".
Qeyd edək ki, son 14 ildə Türkiyə sərmayəçilərinin Azərbaycan iqtisadiyyatına investisiya yatırımları 6,2 milyard dollar təşkil edib.
Maraqlıdır, ekspertlər bu məsələyə necə yanaşır? Onlar türk iş adamlarının Azərbaycan iqtisadiyyatının hansı sahələrinə sərmayə qoymasını məqsədəuyğun hesab edir?
Məsələyə münasibət bildirən İqtisadi Resursların Öyrənilməsi Mərkəzinin direktoru Ruslan Atakişiyevin sözlərinə görə, türk sahibkarlarının kənd təsərrüfatı sektoruna sərmayə qoyması daha məqsədəuyğundur: "Çünki Türkiyədə aqrar sektor inkişaf edən sahələrdən biridir. O üzdən, türk sahibkarlarının bu sahədə təcrübəsi böyük olduğundan, yaxşı olardı ki, buna önəm versinlər. O cümlədən türk iş adamlarının mebel sektoruna sərmayə qoyması məqsədəuyğundur. Ümumən bu sahədə onların Azərbaycanda sərmayə qoyuluşu var. Ancaq yaxşı olardı ki, bunu daha da genişləndirsinlər. Turizm sektoru, mehmanxana tikilişi bu ölkənin sahibkarları üçün cəlbedici sayıla bilər. Bununla yanaşı, yüngül sənaye sektoruna investisiya qoymaları da arzuediləndir. Nəzərə almaq lazımdır ki, geyim məhsulları istehsalı ilə bağlı Türkiyənin çox ciddi uğurları var. Bundan başqa, Türkiyə bir sıra inkişaf etmiş Avropa ölkələrinin brendlərinin regional istehsal sektorunu özündə birləşdirir. Həmin o istehsal sektorlarının Azərbaycana ötürülməsi lazımdır. Digər tərəfdən, bunun Orta Asiya bazarına yönəldilməsinin əhəmiyyəti var".
Vidadi ORDAHALLI
