Ruslan Atakişiyev: "Pərakəndə satış qiyməti 90 qəpik olan "Aİ-92" markalı avtomobil yanacağının başqa bir ölkəyə daşınması bu işlə məşğul olanlara sərf etməyəcək"
Məlum olduğu kimi, Tarif (qiymət) Şurasının 2017-ci ilin 14 iyul tarixində keçirilmiş növbəti iclasında Azərbaycan Respublikası Dövlət Neft Şirkətinin (SOCAR) müraciəti əsasında "Aİ-92" markalı avtomobil benzininin pərakəndə satış qiymətinə yenidən baxılaraq, müvafiq tarif tənzimlənməsi həyata keçirilib. Belə ki, "Aİ-92" markalı avtomobil benzininin pərakəndə satış qiyməti 1 litr üçün 90 qəpik səviyyəsində təsdiq edilib. Bildirilir ki, benzinin qiymət dəyişikliyi yanacağın satış qiymətinin baha olduğu ölkələrə aparılmasının qarşısını alacaq.
Bəllidir ki, "Aİ-92" markalı avtomobil benzininin satış qiymətinin Azərbaycanda ucuz olması nəticəsində bəzi hallarda onun qonşu ölkələrə müxtəlif yollarla daşınması halları müşahidə olunub. Qiymət artımının məhz bu prosesə təsir edəcəyi gözlənir.
Məsələ ilə bağlı fikir bildirən iqtisadçı ekspert Ruslan Atakişiyev də "Bakı-Xəbər"ə açıqlamasında qeyd etdi ki, benzinin satış qiyməti yüksək olan ölkələrə yanacağın daşınması halları qeydə alınırdı: "Bəzi hallarda "Aİ-92" markalı avtomobil benzinin yanacağın satış qiymətinin baha olduğu ölkələrə daşınması müşahidə olunurdu. Zənnimcə, artıq məlum qərardan sonra yanacağın xarici ölkələrə daşınmasının qarşısı alınacaq. Təbii ki, bu işlə məşğul olanların artıq xaricə benzin aparmaq marağı olmayacaq. Çünki pərakəndə satış qiyməti 90 qəpik olan "Aİ-92" markalı avtomobil yanacağının başqa bir ölkəyə aparılıb satılması bu işlə məşğul olanlara sərf etməyəcək".
Həmsöhbətimiz onu da əlavə etdi ki, xarici ölkələrə avtomobil yanacağının daşınması prosesi elə də kütləvi deyildi: "Etiraf edək ki, sərhəd keçid məntəqələrində bu kimi halların qarşısı alınırdı. Gömrük buraxılış məntəqələrində ölkədən çıxış vəziyyətinə xüsusi nəzarət tətbiq olunur".
Günel CƏLİLOVA
