Samir Əliyev: "Banklar verilən kreditlərin geri qayıtmayacağı ehtimalı olduğu üçün risqə getmək istəmir"
2017-ci ilin may ayında Azərbaycanda fəaliyyət göstərən banklar tərəfindən müştərilərə verilən kreditlərin həcmi azalıb.
Maliyyə Bazarlarına Nəzarət Palatasının (MBNP) açıqladığı statistikaya əsasən, may ayının 31-nə bankların müştərilərə verdiyi kreditlərin məbləği 14 mlrd. 378,6 mln. manat təşkil edib ki, bu da mayın 1-ə olan göstərici ilə müqayisədə 655,4 mln. manat və ya 4,36% azalma deməkdir.
Ümumiyyətlə, ilin əvvəlindən bankların müştərilərə verdiyi kreditlərin həcmi 1 mlrd. 559,7 mln. manat azalıb. İqtisadçı ekspert Samir Əliyev məsələ ilə bağlı qəzetimizə açıqlamasında qeyd etdi ki, kredit verilişində yaşanan azalma devalvasiyanın törətdiyi nəticələrdir: "Bəllidir ki, devalvasiyadan öncə banklar özlərini sığortalamaq üçün verdikləri kreditlərin strukturunda dollara üstünlük verməyə başladılar. Bu proses kredit verilməsində problemlər yaşatdı, problemli kreditlərin sayı artmağa başladı. Artıq problemli kreditlərin həcmi aybaay deyil, günbəgün artır. Bu səbəbdən də banklar verilən kreditlərin geri qayıtmayacağı ehtimalı olduğu üçün risqə getmək istəmir. Əslində onları da başa düşmək olar. Çünki bank sektorunun hazırkı vəziyyəti heç də ürəkaçan deyil".
Həmsöhbətimizin sözlərinə görə, bankların kredit şəklində verdiyi vəsait əslində öz vəsaitləri deyil: "Bu o deməkdir ki, kreditlər qaytarılmadıqda bank əmanətçisi qarşısında öhdəliklərini yerinə yetirə bilmir. Bu baxımdan çoxlu sayda bank bağlanıb. Həmçinin, bankdakı aktivlərin zərərli, qeyri-işlək olması onları vadar etdi ki, ya kreditləşməni dayandırsın, ya da məhdudlaşdırsın. Hətta mən düşünürəm ki, digər səbəb Mərkəzi Bankın keçirdiyi depozit hərraclarıdır".
Günel CƏLİLOVA
