Natiq Cəfərli: "Xarici ölkələrdən gələn mallara qiymətləndirmə dərəcəsinə görə rüsum tətbiq olunur və bu qiymətləndirmə əksər hallarda xarici iş adamlarının narazılığına səbəb olur"
"Bəzi hallarda türk sahibkarlar vergi ödəməkdən yayınmağa çalışırlar". Bunu Dövlət Gömrük Komitəsinin (DGK) sədri Aydın Əliyev ötən gün keçirilən mətbuat konfransında bildirib.
O qeyd edib ki, iki ölkə arasında münasibətlər siyasi və iqtisadi sahələrdə qurulur. Lakin Azərbaycanla Türkiyənin münasibətləri yalnız bu iki sahədə qurulmayıb, bizi qardaşlıq bağları birləşdirir: "İki ölkə arasında münasibətlər hər bir sahədə, o cümlədən gömrük sahəsində günbəgün yaxşılaşır. Azərbaycanla Türkiyə arasında siyasi münasibətlər olduqca yüksək səviyyədədir. Biz iqtisadi əlaqələrin də bu səviyyədə qurulmasını istərdik. Son zamanlar gömrük sahəsində qanunvericiliklə bağlı ciddi təkmilləşdirmə işləri aparılır və bunun hesabına Azərbaycan investisiya baxımından olduqca əlverişli məkana çevrilib. Gömrük sahəsində tətbiq etdiyimiz elektron sənəd mübadiləsi, "Yaşıl", "Sarı", "Qırmızı" dəhlizlərin tətbiqi, gömrük rüsumlarından azadolmalar və sair də buna aiddir. Azərbaycanda əlverişli investisiya mühiti formalaşıb.
Türkiyə məhsullarının Azərbaycana ixracı zamanı bir sıra problemlər olur ki, bu da ikili invoysların tətbiqi ilə bağlıdır. Bunu tətbiq edənlər gömrük vergi və rüsumlarından yayınmaq istəyir. Lakin biz ölkəmizə investisiya yatırmaq, məhsul idxal etmək istəyənlərə hər cür şərait yaradırıq. Mən türk iş adamlarına səslənirəm ki, bu cür hallara yol verməyin. Siz isə öz növbənizdə bunu digər həmkarlarına tövsiyə edin".
Bəzi hallarda türkiyəli sahibkarların vergidən yayınması ilə bağlı fikir bildirən iqtisadçı ekspert Natiq Cəfərli "Bakı-Xəbər"ə açıqlamasında qeyd etdi ki, buna səbəb ikili invoysların tətbiqidir: "Xarici ölkələrdən gələn mallara qiymətləndirmə dərəcəsinə görə rüsum tətbiq olunur. Bu qiymətləndirmə əksər hallarda xarici iş adamlarının narazılığına səbəb olur. Türkiyədən hər hansı bir mal alınarkən ona beynəlxalq qaydalara uyğun olaraq sertifikat və qiymət invoysu verilir. Məlum problemin qlobal həlli yollarından biri Azərbaycanın Ümumdünya Ticarət Təşkilatına üzvlük məsələsinin həll olunmasıdır. Azərbaycan adıçəkilən təşkilata üzv olsa, öz üzərinə öhdəlik götürəcək ki, bütün invoysların tanınması həyata keçiriləcək".
Həmsöhbətimizin sözlərinə görə, hazırkı şəraitdə yerli və xarici iş adamları üçün daha münbit şərait yaradılmalıdır: "Bəzi türkiyəli sahibkarların vergi ödəməməsi ilə bağlı komitə sədrinin məlum çıxışında həqiqət var. Və bu sahədə məsuliyyət tək gömrüyün deyil, eyni zamanda vergi işçilərinin də üzərində düşür".
Günel CƏLİLOVA
