Zakir Əhmədov: "Hesab edirəm ki, bu çox müsbət tendensiyadır"
Tarif (qiymət) Şurasının 2017-ci ilin 14 iyul tarixində keçirilmiş növbəti iclasında Azərbaycan Respublikası Dövlət Neft Şirkətinin (SOCAR) müraciəti əsasında "Aİ-92" markalı avtomobil benzininin pərakəndə satış qiymətində artım qərarı ölkədə başqa sahələrdə qiymət artımına səbəb olmayıb.
Məsələ ondadır ki, qərardan keçən müddət ərzində bu özünü göstərməyib. Halbuki, məlum qərardan sonra bəziləri iddia edirdilər ki, guya bu bütün sahələrdə qiymət artımına gətirib çıxaracaq. Ancaq son müşahidələr göstərir ki, deyilənlərin ciddi əsası yoxdur. Belə olmasaydı, o zaman qiymət artımı özünü göstərəcəkdi. Ona görə də "Aİ-92" markalı avtomobil benzininin qiymətinin tənzimlənməsi iqtisadiyyatın əsas sahələri, kənd təsərrüfatı və digər istiqamətlər də daxil olmaqla, ölkədə qiymət artımına heç bir təsir etməyəcək.
Xüsusən ictimai nəqliyyat sektorunda dizel yanacağı, maye və ya sıxılmış qazdan istifadə olunduğuna görə bu sahədə qiymətlər sabit qalacaq. Bakı Nəqliyyat Agentliyi artıq bununla bağlı rəsmi açıqlama da verdi və sərnişindaşımada heç bir artım olmayacağını elan etdi.
O cümlədən Bakı Metropolitenində də elektrik enerjisindən istifadə edildiyi üçün hər hansı artım olmayacaq.
Kənd təsərrüfatında, kənd təsərrüfatı məhsullarının daşınmasında "Aİ-92" markalı benzin istifadə olunmadığına görə bu sahədə də qiymət dəyişikliyinin baş verməyəcəyi şübhəsizdir.
Maraqlıdır, bəs ekspertlərin müşahidələri nədən ibarətdir?
Məsələyə münasibət bildirən ekspert Zakir Əhmədovun sözlərinə görə, ötən 4 gün ərzində hər hansı bir qiymət artımı müşahidə olunmayıb: "Nə istehsalat, nə də xidmət sektorunda hansısa qiymət artımı müşahidə olunmur. Hesab edirəm ki, bu çox müsbət tendensiyadır. Halbuki, əvvəlki dövrlərdə yanacağın qiyməti ilə bağlı artım olanda, bu dərhal digər sahələrdə özünü göstərirdi. Yəni qiymət artımları baş verirdi. Ancaq əvvəlki dövrlərdən fərqli olaraq, bu dəfə bənzər hal baş vermədi. Hesab edirəm ki, analoji vəziyyət bundan sonra da dəyişməyəcək. Nə kənd təsərrüfatı məhsullarının, nə də digər məhsulların qiymətinin artacağı gözlənilmir. "Aİ-92"nin qiymətinin qalxması yalnız fərdi avtomobilə malik olan şəxslərə təsir edə bilər. Hansısa formada bu özünü göstərəcək, amma bu, elə də böyük dərəcədə olmayacaq. Bu da həmin şəxslərin daha qənaətcil olmasını, nəqliyyat sıxlığının qismən aradan qalxmasını şərtləndirəcək".
Vidadi ORDAHALLI
