Rəsul Cahangirli: "Bu ölkədən əczaçılıq məhsullarını idxal etmək olar"
"Bizim konkret təkliflərimiz var ki, hansı məhsulları Latviyaya ixrac edə və hansı məhsulları Latviyadan idxal edə bilərik. Bizim iqlim şəraitimiz elədir ki, iqtisadiyyatlarımız bir-biri ilə rəqabət aparmır". Bunu Prezident İlham Əliyev Riqada Latviya Prezidenti Raymonds Veyonislə birgə mətbuata bəyanatla çıxışında deyib.
Dövlət başçısı bildirib ki, bu, ölkələrimiz arasında o qədər də yüksək səviyyədə olmayan ticarət dövriyyəsinə müsbət təsir göstərəcək. Prezident həmçinin, istehsal etdiyimiz bir çox məhsulları Latviyaya ixrac və idxal edə biləcəyimizi bildirib: "Ona görə, qarşılıqlı ticarət əlaqələrinin inkişafı üçün çox gözəl imkanlar var. O cümlədən biz turizm sahəsində əməkdaşlığa da toxunduq və belə qərara gəlirik ki, Riqa-Bakı reysləri də müntəzəm olaraq həyata keçirilməlidir, müvafiq göstərişlər verilmişdir".
Latviya prezidenti Raymonds Veyonis isə qeyd edib ki, hər iki ölkə qarşıya iddialı məqsədlər qoymalı və imkanlardan tam istifadə etməlidir: "Bu, xüsusən məhsulumuzun Azərbaycana ixracının təşviqinə, habelə informasiya texnologiyaları, əczaçılıq, turizm, o cümlədən müalicəvi turizm sahələrində əməkdaşlığa aiddir. Latviyada yüksək inkişaf etmiş kommersiya bankları şəbəkəsini nəzərdə tutaraq biz peşəkar və müasir maliyyə xidmətləri təklif edə bilərik. Eyni sözləri nəqliyyat sahəsi haqqında da demək olar".
Eyni zamanda, iki ölkə arasında biznes forum da keçirilib. Bütövlükedə Azərbaycanla Latviya arasında iqtisadi-ticarət əldaqələrində hansı istiqamətlərdə əməkdaşlığın dərinləşdirilməsinə ehtiyac var? Ekspertlərin bununla bağlı fikirləri nədən ibarətdir?
Məsələyə münasibət bildirən Rəsul Cahangirlinin sözlərinə görə, iki ölkə arasında ticarət-iqtisadi əlaqələrin inkişaf etdirilməsi ilə bağlı imkanlar müxtəlifdir: "Azərbaycan Latviyaya bir sıra kənd təsərrüfatı məhsullarını ixrac edə bilər. Nəzərə almaq lazımdır ki, adıçəkilən ölkə soyuq iqlim qurşağına yaxın olduğu üçün burada bir sıra kənd təsərrüfatı məhsullarının becərilməsi imkanları məhduddur. O üzdən, Azərbaycan həmin məhsulları Latviyaya ixrac edə bilər. Latviyanın əhalisi o qədər də çox olmadığı üçün, bazarı elə də böyük deyil. Ancaq nəzərə alsaq ki, bu ölkə Avropa İttifaqının üzvüdür, o zaman Azərbaycan məhsullarının oradan digər ittifaq ölkələrinə aparmaq üçün imkanlar var. Hesab edirəm ki, iki ölkənin iqtisadi-ticarət əlaqələrində bu amilə xüsusi diqqət edilməlidir. Latviyayadan əczaçılıq məhsullarını idxal etmək olar. Orada keyfiyyətli dərman məmulatları istehsal olunur. Həmçinin, Latviyanın yaxşı dəniz limanları var. Fikrimcə, digər Avropa ölkələri ilə ticarət əlaqələrində bundan istifadə olunmalıdır". Vidadi ORDAHALLI
