"Azərbaycan və Türkiyədən olan iş adamları tərəfindən birgə müəssisələrin yaradılmasına investisiyanın yatırılması hər iki tərəfə xeyir verəcək". "APA-Economics" xəbər verir ki, bunu Dövlət Gömrük Komitəsinin (DGK) sədri Aydın Əliyev bugünkü mətbuat konfransında bildirib.
"Bu gün Azərbaycan aktiv şəkildə qeyri-neft sektorunun inkişafına investisiya yönəldir. Qanunvericiliyə edilən dəyişikliklər Azərbaycanla Türkiyə arasında mövcud olan ticarət dövriyyəsinin həcmini artırmağa imkan verir. Biz türkiyəli iş adamlarını Azərbaycan iqtisadiyyatına daha aktiv şəkildə investisiya yatırmağa çağırırıq. Hələlik bizim iqtisadi əlaqələrimiz daha çox ticarət və xidmət sahələrində cəmləşib. Biz istərdik ki, bu əlaqələr daha da genişlənsin. Məsələn, biz birgə istehsalı təşkil edib, daha sonra ticarət barədə düşünə bilərik", - deyə A. Əliyev bildirib.
Onun sözlərinə görə, Azərbaycanda istehsal olunan məhsullara MDB ölkələrində böyük tələbat var və bu məhsulların ixracı zamanı güzəşt tətbiq olunur: "Bu amil birgə müəssisələrin yaradılmasında maraqlı olan türkiyəli iş adamlarına müəyyən üstünlük verə bilər. Azərbaycanda biznes üçün əlverişli mühit yaradılıb. İnanıram ki, qarşılıqlı investisiyalar hesabına hər iki ölkənin iqtisadi artımı davamlı olacaq".
Türkiyənin gömrük və ticarət naziri Bülənt Tüfənkci isə son 3 il ərzində ikitərəfli ticarət dövriyyəsinin azalmasına diqqət çəkib: "2014-cü ildə ticarət dövriyyəmiz 3 mlrd. dollar, 2015-ci ildə 2,1 mlrd. dollar, ötən il isə 1,5 mlrd. dollar olub. Buna baxmayaraq, ölkələrimiz ticarət dövriyyəsinin artırılması üçün potensiala malikdir".
"Adətən iki ölkə arasında münasibətlər siyasi və iqtisadi sahələrdə qurulur. Lakin Azərbaycanla Türkiyənin münasibətləri yalnız bu iki sahədə qurulmayıb, bizi qardaşlıq bağları birləşdirir". Bunu da Dövlət Gömrük Komitəsinin sədri Aydın Əliyev bildirib.
Onun sözlərinə görə, iki ölkə arasında münasibətlər hər bir sahədə, o cümlədən gömrük sahəsində günbəgün yaxşılaşır.
"Azərbaycanla Türkiyə arasında siyasi münasibətlər olduqca yüksək səviyyədədir. Biz iqtisadi əlaqələrin də bu səviyyədə qurulmasını istərdik", - deyə A. Əliyev bildirib.
Komitə sədri bildirib ki, son zamanlar gömrük sahəsində qanunvericiliklə bağlı ciddi təkmilləşdirmə işləri aparılır və bunun hesabına Azərbaycan investisiya baxımından olduqca əlverişli məkana çevrilib: "Gömrük sahəsində tətbiq etdiyimiz elektron sənəd mübadiləsi, "Yaşıl", "Sarı", "Qırmızı" dəhlizlərin tətbiqi, gömrük rüsumlarından azadolmalar və sair də buna aiddir. Azərbaycanda əlverişli investisiya mühiti formalaşıb".
Qurum rəhbəri son zamanlar iki ölkə arasında gömrük sahəsində müşahidə olunan problemlərə də toxunub: "Türkiyə məhsullarının Azərbaycana ixracı zamanı bir sıra problemlər olur ki, bu da ikili invoysların tətbiqi ilə bağlıdır. Bunun tətbiq edənlər gömrük vergi və rüsumlarından yayınmaq istəyir. Lakin biz ölkəmizə investisiya yatırmaq, məhsul idxal etmək istəyənlərə hər cür şərait yaradırıq. Mən türk iş adamlarına səslənirəm ki, bu cür hallara yol verməyin. Siz isə öz növbənizdə bunu digər həmkarlarına tövsiyə edin".
A. Əliyev Türkiyənin dünyaca məşhur şirkətlərini də Azərbaycana investisiya yatırmağa dəvət edib.
