Fikrət Yusifov: "İstehsalçı və ya satıcı bilsə ki, əsassız qiymət artımına görə onu artırdığı qiymətin on misli həddində və ondan daha çox cərimə gözləyir..."
Tarif Şurasının 2017-ci il 14 iyul tarixində keçirilmiş növbəti iclasında Azərbaycan Respublikası Dövlət Neft Şirkətinin (SOCAR) müraciəti əsasında "Aİ-92" markalı avtomobil benzininin pərakəndə satış qiymətinə baxılıb, müvafiq tarif tənzimlənməsi həyata keçirilib. Tarif Şurasının iclasında "Aİ-92" markalı avtomobil benzininin pərakəndə satış qiyməti 1 litr üçün 90 qəpik səviyyəsində təsdiq edilib.
"Aİ-92" markalı avtomobil benzininin satış qiymətinin 1 litr üçün 90 qəpik müəyyən olunmasından sonra bəzi sahələrdə qiymət artımının olacağı barədə fikirlər dolaşır.
Benzinin bahalaşmasından sonra bu fürsətdən istifadə edəcək şəxslərlə, başqa sahələrdə qiymət artımına çalışanlara qarşı necə mübarizə aparmaq lazımdır?
İqtisad elmləri doktoru, professor Fikrət Yusifov "Bakı-Xəbər"ə açıqlamasında qeyd etdi ki, benzinin qiymətinin bahalaşmasından istifadə edən bəzi işbazların qiymət artımına gedəcəyi bəllidir: "Bəzi istehsalçıların və satıcıların növbəti dəfə yersiz, əsassız qiymət artımına gedəcəyi gözləniləndir. Bunun qarşısını necə almaq olar? İlk öncə bu məsələ aidiyyəti qurumların diqqət mərkəzində saxlanmalı və heç bir əsas olmadan məhsulların qiymətini qaldıranlara qarşı qanunvericilikdə nəzərdə tutulmuş ən ciddi cəza tədbirləri tətbiq edilməlidir. Bu işlə ölkəmizdə bilavasitə İqtisadiyyat Nazirliyi yanında Antiinhisar Siyasəti və İstehlakçıların Hüquqlarının Müdafiəsi Dövlət Xidməti məşğul olur. Lakin hesab edirəm ki, burada ictimai nəzarət öz sözünü deməlidir. İstehsalçı və ya satıcı bilsə ki, əsassız qiymət artımına görə onu artırdığı qiymətin on misli həddində və ondan daha çox cərimə gözləyir, heç şübhəsiz, o, əsassız qiymət artımına getməzdən öncə bir qədər düşünmək zorunda qalacaq. Bu məsələdə qanunvericilikdə dəyişikliklər etmək yolu ilə cəzaları bir qədər sərtləşdirmək heç də pis olmazdı".
Günel CƏLİLOVA
