Qulu İsmayılov: "Yəqin ki, hökumət bu amili nəzərə aldığı üçün dizelin qiymətini əvvəlki kimi saxlayıb"
Azərbaycanda "Aİ-92" markalı benzinin qiymətinin artması ətrafında ictimai müzakirələr davam edir. Bəziləri bundan əsaslandırılmamış süni ajiotaj yaratmağa çalışır. Bu qəbildən ən çox iddia edilən fikir bundan ibarətdir ki, benzinin qiymətinin artımı mütləq mənada ictimai nəqliyyatda gediş haqqını bahalaşdıracaq. Ancaq ictimai nəqliyyatda istifadə edilən avtomobillərin daha çox sıxılmış maye qaz və dizel yanacağı ilə işlədiyini nəzərə alsaq, bu iddialar təsdiqini tapmır. Çünki həmin məhsulların qiyməti əvvəlki kimi qalıb.
Yaranmış vəziyyətin ictimai nəqliyyatdakı qiymətlərə nə kimi təsirinin olması ilə bağlı iqtisadçı Qulu İsmayılovun fikirlərini öyrəndik. O bildirdi ki, qiymət artımı sərnişin və yükdaşıma nəqliyyat vasitələrinə də təsir etməyəcək:
"İctimai nəqliyyat vasitələri sırasında, yəni avtobuslarda, həmçinin, dəniz nəqliyyatı vasitələri ilə sərnişin və yükdaşıma üsullarında üstünlük təşkil edən yanacaq növü dizeldir. Bəziləri isə maye qazdan istifadə edir. Bu halı "Aİ-92" benzini əvəzinə reaktiv yanacaqdan istifadə edən hava nəqliyyatı vasitələrinə də şamil etmək olar. Göründüyü kimi, yük və sərnişindaşıma vasitələrinin əsas yanacaq növləri dizel, aviabenzin, sıxılmış və maye qaz olduğundan, benzinin qiymətinin qalxması onlara təsir etməyəcək. Bu hal dəmir yolu daşımalarına da təsir etməyəcək. Çünki dəmir yollarında qatarların hərəkəti üçün digər yanacaq növlərindən və elektrik enerjisindən istifadə olunur. Bütün bu əsaslandırmalar benzinin qalxmasının sərnişindaşımaya təsir edəcəyilə bağlı iddiaları əsassız edir. Hesab edirəm ki, bunun cüzi dərəcədə taksi xidmətinə təsiri ola bilər. Bu da elə bir böyük məbləğ olmayacaq. Çünki taksi şirkətləri arasında böyük rəqabət var. Heç kim müştərisini itirməyəcək. Araşdırmamız göstərir ki, benzinin qiyməti qalxandan indiyə kimi taksi xidmətlərinin qiymətində qalxma yoxdur. Rəqabət imkan vermir. Məsələyə qərəzli yox, professional yanaşmaq lazımdır. Müxalifətə yaxın olan bəzi iqtisadçılar məsələyə siyasi çaları o qədər qatırlar ki, adi hesablama yaddan çıxır. Təbii ki, dizelin və ya sıxılmış maye qazın qiymətində artım olsaydı, biz indi səsləndirdiyimiz fikri söyləyə bilməzdik. Yəqin ki, hökumət bu amili nəzərə aldığı üçün dizelin qiymətini əvvəlki kimi saxlayıb".
Məhəmmədəli QƏRİBLİ
