Vüqar Bayramov: "Xarici investisiya ölkədə qeyri-neft sektorunun inkişafı baxımından mühüm əhəmiyyət kəsb edir"
Azərbaycan Səudiyyə Ərəbistanına investisiya layihələri paketini təklif edəcək. Bu barədə diplomatik mənbədən məlumat verilib. Təkliflər Azərbaycan və Səudiyyə Ərəbistanı arasında ticarət-iqtisadi əməkdaşlıq üzrə hökumətlərarası komissiyanın qarşıdakı iclası zamanı təqdim olunacaq. Sayca 5-ci olan iclasın Bakıda oktyabrda keçirilməsi nəzərdə tutulur. Təkliflər nəqliyyat, aqrar, tikinti və İKT sektorunu əhatə edir.
Layihə ilə bağlı Səudiyyə Ərəbistanından Azərbaycana böyük nümayəndə heyətinin səfəri gözlənir. Nümayəndə heyətinə dövlət strukturlarından, eləcə də özəl sektordan nümayəndələr daxildir.
Hazırda hər iki tərəf ticari-iqtisadi və sərmayə münasibətlərinin inkişaf etdirilməsi üzərində iş aparır.
Qeyd edək ki, bu ilin sentyabr ayında "Azərbaycan Hava Yolları" Səudiyyə Ərəbistanından Azərbaycana birbaşa aviareyslər açmağı planlaşdırır. Bu, Səudiyyə Ərəbistanından Azərbaycana gələn turistlərin sayını artıracaq, eləcə də Səudiyyə Ərəbistanını ziyarət etmək istəyən Azərbaycan vətəndaşları üçün gözəl imkan yaradacaq. Ümumiyyətlə, son vaxtlar Səudiyyə Ərəbistanından Azərbaycana böyük turist axını müşahidə edilir.
Hökumətlərarası komissiyanın iclasının yekunlarına əsasən kənd təsərrüfatı, səhiyyə, turizm, informasiya-kommunikasiya texnologiyaları, tikinti, sosial təminat, media və başqa sahələri əhatə edən protokolun imzalanması planlaşdırılır.
Bütövlükdə,ən varlı ərəb ölkəsi olan Səudiyyə Ərəbistanının Azərbaycana sərmayə qoymasına nail olsaq, bu, ölkə iqtisadiyyatının inkişafında necə rol oynayacaq?
Sözügedən məsələni dəyərləndirən iqtisadçı-ekspert Vüqar Bayramovun fikrincə, bu, Azərbaycanda qeyri-neft sektorunun inkişafına müsbət təkan verəcək: "Hədəflərdən biri ondan ibarətdir ki, ölkəyə daha çox investisiya cəlb olunsun və onun da hesabına qeyri-neft sektorunun inkişafına nail olmaq mümkün olsun. O baxımdan xarici investisiya ölkədə qeyri-neft sektorunun inkişafı baxımından mühüm əhəmiyyət kəsb edir. Xarici investisiya, birmənalı şəkildə, Azərbaycan iqtisadiyyatının diversifikasiyasında hədəf rolunu oynayacaq. Bu baxımdan da ərəb ölkələri, o cümlədən Səudiyyə Ərəbistanından ölkəmizə gələn investisiyanın həcminin artması olduqca vacib məqamdır. Bu addım imkan verəcək ki, Azərbaycanda qeyri-neft sektorunun inkişafı hesabına ölkəyə daxil olan valyutanın həcmi artsın. Yəni bu, valyuta bolluğunun yaradılması baxımından vacibdir. Azərbaycan üçün ərəb ölkələrindən investisiyanın cəlb olunması əsas hədəflərdəndir. Ölkə başçısının ərəb ölkələrinə səfəri, eyni zamanda ölkəmizlə ərəb dövlətləri arasında münasibətlərin son illər daha da yaxşılaşması həmin ölkələrdən kapital cəlbi baxımından yeni imkanlar yaradır. Beləcə, ərəb kapitalı daxil olmaqla, Azərbaycan iqtisadi inkişafında xarici investisiyalar aparıcı olacaq. Ərəb ölkələrinin qeyri-neft sektoruna investisiya qoyduqlarını nəzərə alsaq, bu baxımdan həmin sahəyə yönəldilən ərəb investisiyasının həcmində artımların olacağı da gözləniləndir. Bütövlükdə, investisiya portfelində ərəb ölkələrinin payı artacaq".
Vidadi ORDAHALLI
