Aydın Hüseynov: "Bu isə o deməkdir ki, neft emalı sənayesinin müasirləşdirilməsi istiqamətində görülən işlər bir az da sürətləndiriləcək"
Məlum olduğu kimi, Tarif (qiymət) Şurasının 2017-ci il 14 iyul tarixində keçirilən növbəti iclasında Azərbaycan Respublikası Dövlət Neft Şirkətinin (SOCAR) müraciəti əsasında "Aİ-92" markalı avtomobil benzininin pərakəndə satış qiymətinə baxılıb, müvafiq tarif tənzimlənməsi həyata keçirilib. Belə ki, "Aİ-92" markalı avtomobil benzininin pərakəndə satış qiyməti 1 litr üçün 90 qəpik səviyyəsində təsdiq edilib.
Məlumat üçün qeyd edək ki, "Aİ-92" markalı yanacağın qiyməti sonuncu dəfə 2013-cü ildə qaldırılıb. Həmin dövrdə dünya bazarında neftin qiymətinin yüksək olması bu addımın atılmasını zərurətə çevirdi. İndiki dövrdə isə bu addımın atılması müxtəlif iqtisadi reallıqlardan irəli gəlir. Qiymət artımı valyuta gəlirlərinin azalması ilə əlaqələndirilir. Məsələ ondadır ki, SOCAR-ın istehsal etdiyi məhsulların təxminən 70 faizi Azərbaycan bazarında satılır. Yerdə qalan 30 faiz isə xarici bazara ixrac edilir. Ona görə də qiymətə yenidən baxmaq zərurəti yaranıb.
"Aİ-92" markalı benzinin qiymətinin dəyişməsi neft emalı sənayesinin müasirləşdirilməsinin sürətləndirilməsinə dəstək göstərəcək, nəticədə 2040-cı ildə Azərbaycanda neft məhsullarına daxili tələbat tam təmin olunacaq. Bunu ARDNŞ-in neft emalı üzrə vitse-prezidenti Davud Məmmədov bildirib. Görünən odur ki, qiymət artımına gedilməsini şərtləndirən başlıca arqument məhz bu amildir. Reallıq ondan ibarətdir ki, neft emalı sənayesinin müasirləşdirilməsi nə qədər sürətli gedərsə, bu bir o qədər Azərbaycanın xeyrinədir. O baxımdan bəs ekspertlər məsələyə necə yanaşır?
Məsələyə münasibət bildirən millət vəkili Aydın Hüseynovun sözlərinə görə, sözsüz ki, bu addım neft emalı sənayesinin müasirləşdirilməsinə müsbət təsir göstərəcək: "Məsələ ondadır ki, son dövrlər ictimaiyyətdə "Aİ-92" yanacaq növünün keyfiyyəti ilə bağlı müəyyən narahatlıqlar var idi. Bu isə onun maya dəyərinin yüksək başa gəlməsi ilə əlaqədar idi. Qiymət artımından sonra bu problem öz həllini tapacaq və sözügedən yanacaq daha yeni texnologiyalarla istehsal olunacaq. Yeni qiymət keyfiyyətin yüksəlməsinə müsbət təsir göstərəcək. Bu isə o deməkdir ki, neft emalı sənayesinin müasirləşdirilməsi istiqamətində görülən işlər bir az da sürətləndiriləcək. Belə olan halda, bizim ixrac imkanlarımız da genişlənəcək. Həmin yanacaq növünü bu minvalla xaricə ixrac edə bilsək, ölkəyə daxil olan valyuta gəlirləri artacaq. Əlbəttə, yanacağın keyfiyyəti yüksəldikdən sonra bunu xaricə ixrac etmək mümkün olacaq. Bu isə ölkəyə valyuta gəlməsi deməkdir. O üzdən, bu istiqamətdə işlərin görülməsinə müsbət yanaşıram".
Vidadi ORDAHALLI
