Nüsrət İbrahimli: "Sosial mənzillər aztəminatlı ailələr üçün nəzərdə tutulub, müraciətin çoxluğuna baxmayaraq, adından da göründüyü kimi, ehtiyacı olan təbəqələrə verilməsi gözlənir"
Vətəndaşların mənzil-məişət şəraitinin yaxşılaşdırılması məqsədilə ölkə başçısı İlham Əliyevin göstərişinə əsasən paytaxt ərazisində sosial mənzillərin inşası nəzərdə tutulub. Artıq Yasamalda dövlətin dəstəyi ilə imkansız ailələr üçün mənzillərin tikintisi yönündə tədbirlər həyata keçirilir.
Mənzil İnşaatı Dövlət Agentliyinin ilk layihəsi olan Yasamal Yaşayış Kompleksinin tikintisi çərçivəsində yaşayış binasını tikəcək şirkət artıq müəyyənləşib. Qeyd edək ki, "KAT Holding" MMC tərəfindən inşa olunacaq 12 mərtəbəli 60 mənzillik bir bina Mənzil İnşaatı Dövlət Agentliyinin sərəncamına veriləcək, həmin binanın yaşayış sahələri "Güzəştli mənzil" elektron sistemi vasitəsilə satışa çıxarılaraq güzəştlə mənzil əldə etmək hüququ olan şəxslərə təklif olunacaq.
Mənzil İnşaatı Dövlət Agentliyinin (MİDA) 2017-ci ilin 6 ayı ərzində fəaliyyətinin nəticələrinə həsr olunan hesabat iclasında bildirilib ki, müvafiq kateqoriyalara aid olan 5376 vətəndaşın mənzil əldə etmək hüququ təsdiqlənərək həmin şəxslər üçün elektron kabinetin yaradılması təmin edilib.
Sosial mənzillər layihəsinin əhəmiyyəti barədə danışan daşınmaz əmlak məsələləri üzrə ekspert Nüsrət İbrahimli "Bakı-Xəbər"ə açıqlamasında qeyd etdi ki, evə ehtiyacı olan insanların tələbatını ödəmək üçün bunun icra olunması təqdirəlayiqdir: "Mənzilə sahib olmaq üçün 5373 şəxsin müraciət etməsi gözlənilən idi. Çünki mənzil almaq istəyənlərin heç də hamısı İpoteka Fondunun tələblərinə cavab vermir. Bu səbəbdən də həmin şəxslərin, demək olar ki, əksəriyyəti güzəştli mənzilə sahib olmaq istəyir. Ancaq onu da qeyd etmək lazımdır ki, müraciət edən hər bir kəs evlə təmin oluna bilməz. Çünki Mənzil İnşaatı Dövlət Agentliyinin öz şərtləri var. Həmin şərtlərə cavab verənlər mənzil siyahısını düşəcək. Bu gün mənzilə ehtiyacı olan şəxslərin sayı heç də az deyil".
Həmsöhbətimizin sözlərinə görə, sosial mənzillər aztəminatlı ailələr üçün nəzərdə tutulub: "Müraciətin çoxluğuna baxmayaraq, adından da göründüyü kimi, ehtiyacı olan təbəqələrə veriləcək. Yüksək əməkhaqqı alan insanların onsuz da bu cür imkanı var. Odur ki, layihədən mənzili olmayan insanların bəhrələnməsi daha münasibdir. Nəzərə alaq ki, müəyyən qədər insan məhz ev probleminə görə ailə qurmaq üçün gecikir. O baxımdan sosial mənzillərin təyinatı üzrə paylanması vacibdir".
Günel CƏLİLOVA
