Qadir Bayramlı: "Aqroparkların yaradılması fermerlər üçün həm yeni imkanlar qazandıracaq, həm də məhsulun vaxtında yığılması baxımından əhəmiyyəti böyükdür"
"Aqrar sahədə yeni aqroparkların yaradılması sürətlə gedir. Bu proses geniş vüsət almışdır". Nazirlər Kabinetinin 2017-ci ilin birinci yarısının sosial-iqtisadi inkişafının yekunlarına və qarşıda duran vəzifələrə həsr olunan iclasında bu barədə danışan Prezident İlham Əliyev deyib: "Bu günə qədər bizim təşəbbüsümüzlə və maliyyə dəstəyi ilə 32 iri fermer təsərrüfatı yaradılıb. İndi 38 böyük aqropark yaradılır. Özəl sektor bizim təşəbbüsümüzə çox məsuliyyətlə yanaşdı. Tezliklə 38 aqroparkın yaradılması bizim ixrac potensialımızı böyük dərəcədə artıracaq".
Qeyd edək ki, bir sıra rayon və şəhərlərdə aqropark yaradılır.
Ölkədə yaradılan aqroparklar aqrar sahəyə necə təsir edəcək? Aqrar sahə üzrə ekspert Qadir Bayramlı "Bakı-Xəbər"ə açıqlamasında nəzərə çatdırdı ki, qeyri-neft sektoru üzrə kənd təsərrüfatı ən çox ixracat imkanı olan sahədir. Aqroparkların yaradılması fermerlər üçün həm yeni imkanlar qazandıracaq, həm də məhsulun vaxtında yığılması baxımından əhəmiyyəti böyükdür: "Ümumiyyətlə, kənd təsərrüfatı texnikasının ölkəmizdə az olması fermerlərin işini çətinləşdirib. 1990-cı illərin ortalarında kombaynlar növbə ilə sahələri biçirdi. Aqroparklar yaradılandan sonra bu kimi problemlər yaşanmayacaq".
Həmsöhbətimizin sözlərinə görə, aqroparkların respublikanın bütün regionlarında yaradılması daha münasibdir. Digər tərəfdən, aqroparklarda olan avadanlıqlar bütün fermerlər üçün əlçatan olmalıdır: "Aqroparkda olan kənd təsərrüfatı texnikası güzəştli yanacaqla təmin olunmalıdır ki, səmərəli fəaliyyət göstərə bilsin. Həmçinin, onu da deyim ki, aqroparklardan istifadə imkanı barədə fermerlərin maarifləndirilməsinə ehtiyac var. Kənd təsərrüfatının sahə strukturundakı dəyişiklikləri aqroparklar nəzərə almalıdır. Gələcəkdə isə aqroparklarda lazım olan texnikanın yerli istehsal hesabına ödənilməsi daha səmərəli olar. Hətta Gəncə Avtomobil Zavodunda bunun üçün müəyyən imkanlar var. O zavodda hələ ki, az sayda Belarus traktorları yığılır. Azərbaycanda toxum səpən maşınların, gübrə verilməsində istifadə olunan avadanlıq, ziyanvericilərə qarşı lazım olan preparatların ölkədə istehsalı üçün imkanlar var. Bu imkanlar öyrənilməlidir ki, gələcəkdə aqroparklarımız yerli istehsal hesabına aqrar texnikanın həm çeşidini, həm də miqdarını artırsın".
Günel CƏLİLOVA
