Ölkə iqtisadiyyatının qeyri-neft sektoru üzrə çevik inkişafı məqsədilə diqqət mərkəzində saxlanan əsas istiqamətlərdən biri də tikinti sahəsidir. Belə görünür ki, bu sahənin aktiv inkişafı bundan sonra da dövlətin fəaliyyətində əsas prioritetlərdən olacaq. Nazirlər Kabinetinin 2017-ci ilin birinci yarısının sosial-iqtisadi inkişafının yekunlarına və qarşıda duran vəzifələrə həsr olunan iclasında prezident İlham Əliyevin səsləndirdiyi fikirlər də bunu deməyə əsas verir.
Burada dövlət başçısı diqqəti həm də ona yönəltdi ki, qeyd edilənlər tikinti materiallarının istehsal sahəsini də canlandıracaq: "Mənzil İnşaatı Dövlət Agentliyinin xəttilə 29 bina tikilir. "Ağ şəhər"də onlarla bina inşa olunub. Bakının digər yerlərində, eləcə də digər şəhərlərimizdə mənzil tikintisi geniş vüsət alıb. Bunun tikinti materialları sektoruna da müsbət təsiri var və olacaq". Prezident iş adamlarına bu sahəyə daha böyük diqqət yetirmələrini və sərmayə qoymalarını məsləhət görüb: "Çünki bundan sonra inşaat işləri Azərbaycanda daha sürətlə aparılacaq, tikinti materiallarına böyük ehtiyac olacaq".
Ekspertlər də bildirir ki, ölkədə qarşıdakı müddət ərzində aktiv tikinti dövrünün başalmasını gözləmək olar. Xüsusən də dövlətin bu məsələyə diqqətinin artması, sosial evlərin inşası bu bazarda yeni bir vəziyyət formalaşdırır. Bu arada qeyd edək ki, Mənzil İnşaatı Dövlət Agentliyi tərəfindən güzəştli kateqoriya üçün inşa edilən "Yasamal Yaşayış Kompleksi"ndə tikinti işləri sürətlə davam etdirilir. İlk 9 mərtəbəli yaşayış binasında və 3 mərtəbəli, 960 yerlik ümumtəhsil məktəbində son tamamlama işləri gedir. Agentliyin mətbuat katibi Diana Dadaşovanın sözlərinə görə, satış haqda elan verildikdən sonra müraciəti təsdiqlənmiş vətəndaşlar elektron kabinetlərinə daxil olaraq mənzillər barədə ətraflı məlumat ala və istədikləri mənzili seçə biləcəklər. Daha tez müraciət edən vətəndaşlar buradan mənzil əldə edə biləcəklər. İlk dəfə olaraq sosial evlərin tikintisinə investor olaraq tikinti şirkəti də cəlb edilib.
Onu da vurğulayaq ki, sosial mənzil şəhərciyində yalnız güzəştli kateqoriyaya deyil, güzəşt hüququ olmayan vətəndaşlara da mənzillərin satılması nəzərdə tutulur. İqtisadçı ekspert Vüqar Bayramov bu xüsusda bildirir: "Mənzil İnşaatı Dövlət Agentliyi üç yaşayış binasının (ikisi 12 mərtəbəli 1 bloklu, biri 9 mərtəbəli 2 bloklu) tikintisi ilə bağlı inşaat şirkəti ilə müqavilə bağlayıb. İnvestor tərəfindən inşa olunacaq 12 mərtəbəli 60 mənzillik bir bina Mənzil İnşaatı Dövlət Agentliyinin sərəncamına veriləcək, həmin binanın yaşayış sahələri "Güzəştli mənzil" elektron sistemi vasitəsilə satışa çıxarılaraq güzəştlə mənzil əldə etmək hüququ olan şəxslərə təklif olunacaq. Digər iki bina şirkət tərəfindən birbaşa şəhərcikdə mənzil almaq istəyi olanlara təklif ediləcək. Şəhərcikdə yerləşəcək həmin binalardakı mənzillərə güzəştli kateqoriyadan olmayan vətəndaşlar da sahib ola biləcəklər". Onun sözlərinə əsasən, mənzillərin qiyməti baha olacaq: "Gözlənilir ki, həmin binalardakı mənzillərin qiyməti sosial mənzillərə nisbətən daha yüksək olacaq. Təbii ki, Mənzil İnşaatı Dövlət Agentliyi həmin binalardakı mənzillərin qiymətinə müdaxilə etməyəcək, bu, birbaşa əmlak bazarındakı qiymətlərə uyğun olacaq. Bununla yanaşı, vətəndaşın güzəşt statusu yoxdusa və sosial mənzil şəhərciyində evə sahib olmaq istəyirsə, sözügedən iki binadakı mənzilləri almaq üçün müraciət etmək hüququ olacaq. Eyni zamanda 60 mənzillik 12 mərtəbəli binanın pulsuz olaraq Mənzil İnşaatı Dövlət Agentliyinin sərəncamına verilməsi sosial evlərin ümumi xərcinin, eləcə də sosial mənzillər üçün aylıq ödəniş məbləğinin azalmasına səbəb ola bilər".
Qeyd edək ki, istifadəyə veriləcək mənzillər 1, 2 və 3 otaqlı olacaq. İlk il ümumiyyətlə 2 min mənzil istifadəyə veriləcək, daha sonra isə hər il 3 min mənzilin vətəndaşlara təklif olunması hədəfdədir. Güzəştli mənzillər ümumi illik mənzil tələbatının 10 faizini təşkil edəcək. Eyni zamanda, digər şəhər və rayonlarda da mərhələli şəkildə mənzillər inşa ediləcək. Bütün bunlar mənzili olmayan, amma güzəştli şərtlərlə aylıq ödəniş etmək imkanı olanları ev sahibi edə biləcək. hesab edilir ki, bütün bunlar olduqca əhəmiyyətlidir və həm ölkədə ev sahibi olanların sayını artıracaq, həm də qeyd olunduğu kimi, inşaat sektorunu canlandıracaq. Xüsusən də gələcəkdə sosial evlərin sayının artırılması üçün görülən işlər bu sahədə aktivlik səviyyəsini daha da yüksəldəcək.
Namiq QULİYEV
