Vüqar Bayramov: "Azərbaycanın valyuta ehtiyatları ölkənin xarici borcundan 5 dəfə çoxdur"
"Bizim valyuta ehtiyatlarımız artıb və bu günə 40,6 milyard dollar təşkil edir. Bu da çox gözəl göstəricidir. Çünki ilin əvvəlindən bu günə qədər valyuta ehtiyatlarımız təxminən 3 milyard dollar artıb". Bu fikri Prezident İlham Əliyev Nazirlər Kabinetinin 2017-ci ilin birinci yarısının sosial-iqtisadi inkişafının yekunlarına və qarşıda duran vəzifələrə həsr olunan iclasında bildirib.
Dövlət başçısının sözlərinə görə, neftin qiymətinin düşmə ehtimalına rəğmən, ölkənin valyuta ehtiyatları artır: "Baxın, neftin qiyməti kəskin şəkildə düşüb. Sonra isə müəyyən dərəcədə qalxıb. Yenə də düşmə ehtimalı var. Amma bizim valyuta ehtiyatlarımız artır. Nəyə görə? Düşünülmüş siyasətə görə. Ona görə ki, biz heç vaxt populist işlərlə məşğul olmamışıq. Biz hər zaman ölkəmizin uzunmüddətli inkişafı ilə məşğul olmuşuq. Biz həm qənaət etdik, həm islahatlar apardıq. Ancaq strateji əhəmiyyət daşıyan layihələrə vəsait ayırdıq. Əlbəttə ki, biz idxalı azaltmışıq, ixracı isə artırmışıq. Büdcə ilə bağlı heç bir problem yoxdur. Ona görə Neft Fondundan büdcəyə transferlər də azaldı. Yəni ilin altı ayında valyuta ehtiyatlarının 3 milyard dollar artması mükəmməl nəticədir. Bizim kifayət qədər güclü iqtisadi imkanlarımız və valyuta ehtiyatlarımız var. Azərbaycan adambaşına düşən valyuta ehtiyatlarının həcminə görə qabaqcıl ölkələr sırasındadır".
Görünən odur ki, düzgün iqtisadi siyasətin nəticəsi olaraq ölkənin valyuta ehtiyatları artmağa doğru gedir. Maraqlıdır, bəs iqtisadçılar bu artımın səbəblərini nə ilə əlaqələndirir? Sözügedən məsələni "Bakı-Xəbər"ə şərh edən iqtisadçı-ekspert Vüqar Bayramovun sözlərinə görə, postneft dövrü başlanan zaman əsas prioritet məsələlərdən biri ölkədə qeyri-neft sektorunun inkişafı idi: "O zaman hökumət valyuta ehtiyatlarının qorunub saxlanması ilə bağlı göstərişlər verdi. Nəticədə 2016-cı ilin ikinci yarısından başlayaraq Mərkəzi Bank intervensiyanı azaltdı və bu da ehtiyatların artmasına şərait yaratdı. Eyni zamanda, Dövlət Neft Fondunun ehtiyatları daha optimal şəkildə xərcləndi. Aparılan iqtisadi siyasət valyuta ehtiyatlarının artmasına zəmin yaratdı və nəticədə ölkə iqtisadiyyatı neftin yeni qiymətlərinə uyğunlaşdı. Bütün bunlar, təbii ki, valyuta ehtiyatlarının artırılması baxımından vacib idi. Düşünürəm ki, valyuta ehtiyatlarının qorunub saxlanması və artırılması siyasəti vacib idi. Etiraf etmək lazımdır ki, hökumət bu siyasəti uğurla həyata keçirə bildi. Bu, iqtisadi, sosial və psixoloji təsirlərə malikdir. Eyni zamanda, nəzərə alaq ki, Azərbaycanın valyuta ehtiyatları ölkənin xarici borcundan 5 dəfə çoxdur. Bu da, təbii ki, sığorta yastığının formalaşması baxımından olduqca vacib əhəmiyyət kəsb edir. Ona görə də bu hədəfə nail olunması həm də Azərbaycanda makroiqtisadi sabitliyin qorunması baxımından vacib elementlərdən hesab edilir".
Vidadi ORDAHALLI
