Ruslan Atakişiyev: "Bu sahədə ciddi irəliləyişlərə nail olmaq üçün özəl sektorun da üzərinə böyük iş düşür"
"Bu ilin 6 ayında ixrac 36 faiz artıb. İdxal 15 faiz azalıb. Cari ilin əvvəlindən qeyri-neft iqtisadiyyatı 1,7 faiz, qeyri-neft sənayesi isə 4.4 faiz artıb". Bunu Azərbaycan Prezidenti İlham Əliyev Nazirlər Kabinetinin 2017-ci ilin birinci yarısının sosial-iqtisadi inkişafının yekunlarına və qarşıda duran vəzifələrə həsr olunmuş iclasda deyib.
Ölkə başçısının sözlərinə görə, bu il ölkə iqtisadiyyatına 5 milyard dollar sərmayə qoyulub. Azərbaycanın valyuta ehtiyatları hazırda 40,6 mlrd. dollar təşkil edir. Prezidentin açıqlamasından o da məlum olub ki, ölkədə makroiqtisadi sabitlik təmin olunub: "Bu ilin ötən dövründə 122 min yeni iş yeri açılıb ki, onlardan 101 mini daimidir. Bundan əlavə, ilin 6 ayı ixrac 36 faiz artıb. İdxal 15 faiz azalıb. Müsbət saldo 1,9 milyard dollar təşkil edir. Mövcud iqtisadi sabitlik qorunub-saxlanmalı, istehlak qiymətlərinə daim nəzarət olunmalı, süni qiymət artımına imkan verilməməlidir.
Makroiqtisadi sabitlik təmin olunub, manatın məzənnəsi sabitləşib, tələbat daha çox yerli istehsala yönəlib. Növbəti dövr üçün prioritetlər dəyişməz olaraq qalır. Qeyri-neft sektorunun inkişafı əsas məsələdir. Ölkə üzrə sənaye parkları yaradılır. Orada rezidentlərin sayı çoxalıb".
Ölkədə ixracın artması, idxalın azalması iqtisadiyyatda müşahidə olunan canlanmadan xəbər verir. Artıq əminliklə demək olar ki, iqtisadi böhran geridə qalıb. Azərbaycan iqtisadiyyatı qeyri-neft sektoruna söykənərək inkişaf edir.
Məsələyə münasibət bildirən İqtisadi Resursların Öyrənilməsi Mərkəzinin direktoru Ruslan Atakişiyev ümumən buna müsbət yanaşsa da, hesab edir ki, görüləsi işlər də çoxdur: "Bütövlükdə götürəndə iqtisadiyyatda canlanma müşahidə olunur. Hesab edirəm ki, bu müsbət tendensiyadır və bunu daha da inkişaf etdirmək lazımdır. Nəzərə almaq lazımdır ki, üç il bundan əvvəl bizim ixracatımızda 94 faiz neft və neft məhsulları idi. İxrac olunan məhsulların cəmi 6 faizi qeyri-neft məhsulları təşkil edirdi. İndi isə bu nisbət dəyişməyə doğru gedir və qeyri-neft məhsullarının çəkisi artmağa başlayıb. Hələ ki, bunun çəkisi əhəmiyyətli dərəcədə artmasa da, amma buna doğru gedir. Nəzərə almaq lazımdır ki, bu, vaxt aparan məsələdir. Digər tərəfdən də bu sahədə ciddi irəliləyişlərə nail olmaq üçün özəl sektorun da üzərinə böyük iş düşür. Özəl sektor maksimum çalışmalıdır ki, ölkədə qeyri-neft sektorunun çəkisi artsın. Qeyri-neft sektoruna söykənən iqtisadiyyat inkişaf etsin. Çalışmaq lazımdır ki, bu sektor rəqabət və ixrac qabiliyyətli olsun. O zaman neft sektorundan asılılıq xeyli azalacaq. Hesab edirəm ki, bu istiqamətdə səylərimizi bir az da artırmalıyıq".
Vidadi ORDAHALLI
