Zakir Əhmədov: "Belə olduğu halda, bütün məcburi köçkünlər yaxın illərdə mənzillə təmin olunacaq"
Xəbər verildiyi kimi, iyulun 12-də Azərbaycan Respublikasının Prezidenti İlham Əliyevin sədrliyi ilə Nazirlər Kabinetinin 2017-ci ilin birinci yarısının sosial-iqtisadi inkişafının yekunlarına və qarşıda duran vəzifələrə həsr olunan iclası keçirilib. İclasda çıxış edən dövlət başçısı bir sıra məsələlərə toxunub. O, çıxışında məcburi köçkünlərin mənzil təminatının yaxşılaşdırılmasında sahibkarların iştirak etməsinin əhəmiyyətinə toxunub.
Onun sözlərinə görə, sahibkarların sosial məsuliyyəti yüksək səviyyədə olmalıdır: "Masazırda, Sumqayıtda, Qaradağ rayonunda belə təşəbbüslər irəli sürülür. Onların arasında Qaradağ layihəsini xüsusilə qeyd etmək istərdim. Çünki bu bir yenilikdir, yeni təşəbbüsdür. Bu, özəl sektor tərəfindən inşa edilən böyük şəhərcikdir. Orada min köçkün ailəsi məskunlaşacaq və bu çox gözəl nümunədir.
Bu gün Azərbaycanda yaratdığımız şərait nəticəsində yüzlərlə, minlərlə sahibkar öz fəaliyyətini genişləndirir. Bizim sahibkarlarımız böyük imkanlara malikdirlər. Sahibkarların sosial məsuliyyəti də yüksək səviyyədə olmalıdır. Qaradağ rayonunda sahibkarlar tərəfindən öz vəsaitləri hesabına 1000 mənzillik şəhərciyin tikilməsi çox yaxşı təşəbbüsdür. Mən bunu bəyənirəm, alqışlayıram. Bu, bütün sahibkarlara nümunə olmalıdır. Mən bundan sonra sahibkarların fəaliyyətini o cümlədən bu göstəriciyə görə də qiymətləndirəcəyəm".
Sözsüz ki, sahibkarların bu işdə fəal iştirakı məcburi köçkünlərin mənzil şəraitinin daha tez yaxşılaşmasına təkan verə bilər. Bu zaman dövlətin üzərinə düşən yük azalacaq. Maraqlıdır, bəs ekspertlər bu təşəbbüsə necə yanaşır? Məsələyə münasibət bildirən ekspert Zakir Əhmədovun sözlərinə görə, bu çox təqdirəlayiq addımdır: "Çünki son illər ölkədə sahibkarlıq sektoru xeyli inkişaf edib. Dövlət səviyyəsində sahibkarlara yaradılan şərait artıq öz bəhrəsini verir. Son illər aparılan ciddi struktur islahatları, vergi sisteminin sadələşdirilməsi, yoxlamaların dayandırılması sahibkarların fəaliyyət imkanlarını bir az da genişləndirib. Sahibkarlara yaradılan hərtərəfli şərait onlara imkan verir ki, bu kimi sosial layihələrdə yaxından iştirak etsinlər. O baxımdan hesab edirəm ki, bundan sonra daha çox sahibkar Prezidentin bu çağırışına qoşulmalı və məcburi köçkünlərin mənzil şəraitinin yaxşılaşdırılmasına yardım etməlidir. Fikrimcə, Azərbaycanda çoxsaylı imkanlı sahibkar var ki, bu işə yaxından töhfə verə bilər. Onların imkanlarından istifadə edilməlidir. Bununla yanaşı, vətənpərvər, sosial məsuliyyəti yüksək səviyyədə olan sahibkarlar maksimum çalışmalıdır ki, bu işdə fəal iştirak etsin. Belə olduğu halda, bütün məcburi köçkünlər yaxın illərdə mənzillə təmin olunacaq. Nəzərə almaq lazımdır ki, bu məsələdə bütün ağırlığı dövlətin üzərinə qoymaq doğru deyil".
Vidadi ORDAHALLI
