Əli Əlirzayev: "Bundan ötrü işçi qüvvəsini, əməkhaqqını, məhsuldarlığı artırmalıyıq, intensiv istehsalata keçməliyik"
Dinamik inkişaf yolu keçən müstəqil Azərbaycanın son illər regionun aparıcı dövlətlərindən birinə çevrilməsi ilk növbədə elmi əsaslar üzərində gerçəkləşdirilən milli iqtisadi inkişaf modelinə əsaslanır. Davamlı inkişaf tempinin qorunub saxlanması baxımından qarşıdakı illərdə respublikanın inkişaf hədəflərinin düzgün müəyyənləşdirilməsi son dərəcə aktual məsələyə çevrilib.
Prezident İlham Əliyev hələ Nazirlər Kabinetinin 2011-ci ilin 9 ayının sosial-iqtisadi inkişafının yekunlarına həsr olunmuş iclasında bəyan edib ki, məqsəd 2020-ci ilədək Azərbaycanda ümumdaxili məhsulun ən azı 2 dəfəyədək artımına nail olmaq, respublikanı inkişaf etmiş ölkələr sırasında görməkdir.
Dövlət başçısı bu məqsədlərin uğurla gerçəkləşdirilməsi üçün kompleks tədbirlər həyata keçirir. Prezidentin 30 dekabr 2012-ci il tarixli Sərəncamı ilə təsdiqlənmiş "Azərbaycan 2020: gələcəyə baxış" İnkişaf Konsepsiyasında göstərildiyi kimi, hazırda Azərbaycanın yeni inkişaf mərhələsinin əsas hədəfi innovasiyayönümlü iqtisadiyyatın formalaşdırılması, sosial sahədə önləyici inkişaf trendinin təmini, əhalinin rifahının layiqli, qabaqcıl beynəlxalq standartlara uyğun səviyyəyə çatdırılması, habelə elmin, mədəniyyətin inkişafında, ictimai həyatın bütün istiqamətlərində yeni nailiyyətlərin əldə olunmasıdır. Konsepsiyaya əsasən, 2020-ci ilədək adambaşına düşən ÜDM-in 13.000 dollara çatdırılması, başqa sözlə, iki dəfəyədək artımı, həmin artımın da əsasən qeyri-neft sektorunun inkişafı hesabına təmin edilməsi nəzərdə tutulur. Ümumdaxili məhsulun 2 dəfəyədək artımına nail olmaq məqsədilə turizmin və informasiya-kommunikasiya texnologiyalarının, o cümlədən sənayenin innovasiyayönümlü sahələrinin inkişafı diqqət mərkəzindədir. Bununla bağlı sistemli işlər görülür. Bütün bunların fonunda, 2020-ci ilədək ölkədə ÜDM-i 2 dəfəyədək artırmaq mümkün olacaqmı?
Məsələyə münasibət bildirən iqtisadçı-alim Əli Əlirzayevin sözlərinə görə, buna nail olmaq üçün çox çalışmaq lazımdır: "Yəni bir müddət əvvəl yaranan iqtisadi böhran bunu bir az gecikdirə bilər. Təkcə ÜDM-in 2 dəfə artması ilə iş bitmir. Bunun adambaşına düşən səviyyəsi artmalıdır, bununla yanaşı, xərclər azalmalıdır. Xərclərin səmərəli hesablanması vacib amillərdən biridir. Eyni zamanda, sosial məsələlərə ayrılan vəsait artmalıdır. Ona görə də hər bir proqnozun özünün müəyyən bir metodikası var. Təkcə qeyri-neft sektoru hesabına ÜDM-i 2 dəfəyədək artırmaq asan məsələ deyil. Ola bilsin ki, 2020-ci ilə qədər bu mümkün olmasın, amma 2025-ci ilə qədər buna nail olmaq mümkündür. Bundan ötrü işçi qüvvəsini, əməkhaqqını, məhsuldarlığı artırmalıyıq, intensiv istehsalata keçməliyik. Həmçinin, yeni məhsullar istehsal etməliyik, ixracat sistemi inkişaf etməlidir. Ona görə də təkamül yolu ilə buna nail ola bilərik".
Vidadi ORDAHALLI
