Əli Əlirzayev: "İnvestisiya baxımından çox sərfəli biznes olduğuna görə Azərbaycanın mənzil bazarı əcnəbilər üçün daha cəlbedici görünür"
Son zamanlar xarici ölkə vətəndaşları Azərbaycanda, xüsusən də Bakıda mənzil almağa üstünlük verməyə başlayıb. Məlumatlara görə, əcnəbi vətəndaşların Azərbaycanda mənzilə olan tələbatında artım müşahidə edilir. Əcnəbilər əsasən şəhərin mərkəzi hissəsində və dənizə yaxın ərazilərdə mənzil almağa üstünlük verir.
Daşınmaz əmlak bazarına əcnəbilərin marağının artması barədə fikir bildirən iqtisadçı-ekspert Əli Əlirzayev "Bakı-Xəbər"ə açıqlamasında qeyd etdi ki, xarici ölkə vətəndaşlarının Azərbaycanda mənzil alması səbəblərindən biri ölkəmizdə müşahidə olunan stabillikdir: "Əcnəbilər ən çox paytaxt ərazisində olan mənzillərin alışına üstünlük verir. Onlar mənzili həm yaşamaq, həm də ofis kimi istifadə etmək məqsədilə alır. İnvestisiya baxımından çox sərfəli biznesdir. Azərbaycanın mənzil bazarı əcnəbilər üçün daha cəlbedici görünür. Azərbaycandan əsasən də qonşu ölkələrdən olan vətəndaşlar mənzil alır. Ən çox daşınmaz əmlaka sahib olmaq istəyən əcnəbilər əsasən Türkiyə, İran vətəndaşları, Rusiya vətəndaşı olan azərbaycanlılardır. Onlar da əsasən biznes yatırımları qoyan sahibkarlar, tələbələr, işlə bağlı olaraq burada ailə qurub yaşayan əcnəbilərdən ibarətdir".
Həmsöhbətimiz onu da bildirdi ki, daşınmaz əmlak alan əcnəbilər arasında tələbələrin sayı az deyil: "İmkanı olan tələbələr təhsil aldığı ali məktəbə yaxın ərazidən mənzil alır. Tələbə universiteti bitirəndə həmin mənzili satışa çıxarır".
İqtisadçının fikrincə, hazırda daşınmaz əmlak bazarı investisiya deməkdir: "Daşınmaz əmlak bazarında qiymətlərin stabil olması da imkan verir ki, alınan mənzilə investisiya kimi yanaşanlar prosesdə udsun. Çünki Azərbaycanda mənzillərin qiymətinin düşəcəyi gözlənilmir. Əksinə, ölkəmizdə mənzil qiymətləri artan templə inkişaf edir. Hazırda isə mənzil bazarında durğunluqdur, qiymətlər qalxmır. Bu da əcnəbi vətəndaşlara Azərbaycan bazarına stabil bazar kimi yanaşmağa imkan verir. Yəni risqlərin olmaması əcnəbiləri Azərbaycanda daha çox mənzil almağa həvəsləndirib".
Günel CƏLİLOVA
