Vergi Nazirliyinin məşhur "ASAN" brendi ilə əməkdaşlığı yeni mərhələdə...
Ruslan Atakişiyev: "Əvvəllər hansısa firmanın qeydiyyatdan keçməsi bir müddət vaxt aparırdısa, indi buna bir neçə dəqiqə kifayət edir"
Xəbər verildiyi kimi, Vergilər Nazirliyi ilə Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyi arasında gələcək əməkdaşlığa dair memorandum imzalanıb.
Vergilər Nazirliyinin Tədris Mərkəzinin rəisi Əli Həsənov bildirib ki, nazirlik insan resurslarının idarə edilməsi, kadr hazırlığı və ixtisasartırma, işə qəbul prosesinin şəffaflaşdırılması, peşə etikasına əməletmə səviyyəsinin yüksəldilməsi, idarəetmə sisteminin elektronlaşdırılması, vergi orqanlarının yüksək hazırlıqlı, təşəbbüskar, innovativ yeniliklərə meylli kadrlar hesabına komplektləşdirilməsi yolu ilə vergi inzibatçılığının daha da təkmilləşdirilməsi istiqamətində qarşıya qoyulmuş vəzifələrin icrası ilə bağlı işləri davam etdirir.
Vurğulanıb ki, bu işlərin davamı olaraq Vergilər Nazirliyi ilə Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyi arasında ASAN könüllülərinin istehsalat təcrübəsi keçmələrinə dair ötən il iyulun 28-də müqavilə imzalanıb.
Müqaviləyə əsasən, 2017-ci ilin ilk 6 ayı ərzində "ASAN xidmət" mərkəzlərinə müqavilə əsasında cəlb edilmiş 30 nəfər ASAN könüllüsünün dövlət vergi orqanlarında istehsalat təcrübəsi keçməsi təmin edilib. Bu dövr ərzində ASAN könüllüləri vergi orqanlarında təcrübə keçərək Azərbaycanda vergi orqanlarının fəaliyyət istiqamətləri və bu orqanlarda mövcud olan təcrübə ilə yaxından tanış olub.
Ümumilikdə, iki qurum arasında memorandum imzalanmasının nə faydası var?
Məsələyə münasibət bildirən İqtisadi Resursların Öyrənilməsi Mərkəzinin direktoru Ruslan Atakişiyevin sözlərinə görə, bunun bir sıra faydası var: "Vergilər Nazirliyi ilə "ASAN xidmət" arasında əməkdaşlığın qurulması həm əhaliyə, həm də sahibkarlıq subyektlərinə, vergi ödəyicilərinə göstərilən xidmətin keyfiyyətinin artırılması məqsədi daşıyır. Məsələn, "ASAN xidmət"in göstərdiyi əksər xidmətlər var ki, bunlar dolayı və yaxud da birbaşa şəkildə vergi orqanlarının fəaliyyətinin əhatə dairəsinə düşür. Ümumiyyətlə, vergi xidmətinin təşkili prinsipləri və yaxud da vergi qanunvericiliyinin həyata keçirilməsi ilə əlaqəli olan elə sahələr var ki, "ASAN xidmət" məhz bu sahələrdə o işləri görür. Elə buna misal olaraq "ASAN imza"nın alınmasını göstərmək olar. Həmçinin, müxtəlif əmlakın qeydiyyatı, xırda və iri vergi ödəyicisi olan sahibkarların mütəmadi olaraq gündəlik işlərinin əksəriyyəti məhz "ASAN xidmət"dən keçir. Bütün bunlar da dolayısı olaraq vergi xidməti orqanları üçün müəyyən əhəmiyyət kəsb edir. Ona görə də sözügedən orqanlar arasında əməkdaşlığın daha da dərinləşməsi son nəticədə sahibkarlıq subyektlərinə göstərilən xidmətin keyfiyyətinin artırılması baxımından mühüm əhəmiyyət kəsb edir. Həmçinin, bu, göstərilən xidmətə sərf olunan vaxt itkisinin minimuma endirilməsində ciddi rol oynayır. Artıq Vergilər Nazirliyi tərəfindən elektron qeydiyyat həyata keçirilir. Əvvəllər hansısa firmanın qeydiyyatdan keçməsi bir müddət vaxt aparırdısa, indi buna bir neçə dəqiqə kifayət edir. Ümumilikdə, bura bir sıra xidmətlər daxildir".
Vidadi ORDAHALLI
