Rəsul Cahangirli: "Bunun müsbət effekt verəcəyi qənaətindəyəm"
Məlum olduğu kimi, kənd təsərrüfatının maliyyələşdirilməsi üzrə tədbirlər planının son variantı təsdiq olunub. Planda kənd təsərrüfatı üzrə maliyyələşdirmə mexanizmlərinin təkmilləşdirilməsi, sektora innovativ və girovsuz kreditlərin tətbiqi mexanizmlərinin hazırlanması, aqrar sektora təsir edən risqlərin idarə olunması, aqrar sığortanın inkişaf etdirilməsi, aqrar sahəyə investisiya qoyuluşlarının təşviqi, kənd təsərrüfatı məhsulları istehsalçılarının maliyyə savadlığının artırılması və s. konkret tədbirlər nəzərdə tutulub.
Müzakirələr zamanı bildirilib ki, hazırlanmış tədbirlər planının reallaşdırılması kənd təsərrüfatı sahəsi üzrə maliyyələşdirmə mexanizmlərinin təkmilləşdirilməsinə və son nəticədə aqrar sahəyə investisiya qoyuluşlarının təşviqinə imkan verəcək.
Təqdim olunan tədbirlər planı layihəsi ümumilikdə qəbul olunub və Kənd Təsərrüfatı Nazirliyinə tapşırılıb ki, aparılmış müzakirələrin nəticələri, verilmiş rəy və təkliflər nəzərə alınmaqla yekun variant hazırlansın və Maliyyə Sabitliyi Şurasının növbəti müzakirəsinə təqdim edilsin. Kənd Təsərrüfatı Nazirliyi tərəfindən yenidən işlənərək təkmilləşdirilmiş və müvafiq dövlət qurumları ilə razılaşdırılmış tədbirlər planının son variantı 10 iyul 2017-ci il tarixində Maliyyə Sabitliyi Şurasının növbəti toplantısında təsdiq olunub.
Bütövlükdə, tədbirlər planının təsdiqlənməsini ekspertlər necə dəyərləndirir? Bu, kənd təsərrüfatının inkişafına nə kimi müsbət təsir göstərə bilər? Məsələyə münasibət bildirən ekspert Rəsul Cahangirli tədbirlər planının təsdiq olunmasını müsbət qiymətləndirsə də, hesab edir ki, məsələyə sistemli yanaşma olmalıdır: "Kənd təsərrüfatı məhsulları istehsalının qayğısına daha çox qalmaq lazımdır. Çünki bölgələrin iqtisadiyyatında əsas gəlir mənbəyi aqrar məhsulların istehsalı və tədarükünün təşkil edilməsidir. Nəzərə almaq lazımdır ki, ölkədə əmək qabiliyyətli əhalinin 40 faizi məhz aqrar istehsala məxsus sahələrdə, yəni regionlarda məskunlaşıb. Odur ki, kənd təsərrüfatı məhsulları istehsalına yanaşmada yeni mexanizmlər təşkil edilməli, investisiyalar cəlb etmək yolları axtarılmalı və kooperativ təsərrüfat üsullarından istifadə kimi metodların tətbiqindən geniş istifadə olunmalıdır. Tədbirlər planında ölkədə rəqabətqabiliyyətli kənd təsərrüfatı sektoru formalaşdırmaq üçün istehsalçıların maliyyə resursları ilə təminatını yaxşılaşdırmaq nəzərdə tutulur. Hesab edirəm ki, aqrar sahədə maliyyələşmə mexanizminin təkmilləşdirilməsi bu sektorda istehsalı stimullaşdıracaq. O üzdən, bunun müsbət effekt verəcəyi qənaətindəyəm".
Vidadi ORDAHALLI
