Fikrət Yusifov: "... ölkə iqtisadiyyatının neftdən asılılığının optimallaşdırılmasını hədəfləyir"
Ölkədə fəaliyyət göstərən tekstil istehsalçıları və ixracatçılarının təşəbbüsü, İqtisadiyyat Nazirliyinin və Azərbaycan Respublikası Sahibkarlar (İşəgötürənlər) Təşkilatları Milli Konfederasiyasının dəstəyi ilə Azərbaycan Tekstil İstehsalçıları və İxracatçıları Assosiasiyası təsis olunub. Bununla bağlı bir neçə gün öncə keçirilən tədbirdə rəsmi şəxslərlə yanaşı, tekstil istehsalı və ixracı ilə məşğul olan sahibkarlar da iştirak edib.
Tədbirdə iqtisadiyyat nazirinin müavini Sahib Məmmədov sahibkarlığın inkişafının Azərbaycan Respublikası Prezidentinin rəhbərliyi ilə həyata keçirilən uğurlu iqtisadi siyasətin prioritet istiqamətlərindən olduğunu vurğulayıb.
Dövlət başçısının iqtisadi islahatlar paketi çərçivəsində həyata keçirilən tədbirlər barədə məlumat verən S.Məmmədov sahibkarlıq subyektlərində aparılan yoxlamaların dayandırılmasının, lisenziyalaşdırma sisteminin təkmilləşdirilməsinin, sahibkarların şikayətlərinə daha həssas yanaşılması məqsədilə apelyasiya şuralarının yaradılmasının, investisiyanın təşviqi sənədinin verilməsinin və digər tədbirlərin özəl sektorun inkişafında xüsusi rolunu nəzərə çatdırıb.
Bildirilib ki, tekstil istehsalı və ixracı ilə məşğul olan sahibkarların fəaliyyətini əlaqələndirmək, onlar arasında əməkdaşlığı genişləndirmək məqsədilə yaradılan assosiasiyanın fəaliyyəti tekstil istehsalının artırılması, ölkənin ixrac imkanlarının genişləndirilməsi baxımından əhəmiyyətli olacaq.
Yeni yaranan Azərbaycan Tekstil İstehsalçıları və İxracatçıları Assosiasiyası barədə fikir bildirən iqtisad elmləri doktoru, professor Fikrət Yusifov "Bakı-Xəbər"ə açıqlamasında qeyd etdi ki, qarşıya qoyulan əsas məqsədlərdən biri də yüngül sənayenin inkişafıdır: "Bəllidir ki, əsas aparıcı sahə toxuculuqdur. Vaxtilə Azərbaycanda toxuculuq sənayesinin ənənəsi inkişaf edib. Mingəçevirdə toxuculuq kombinatı olub. İndisə həmin baza üzrə böyük toxuculuq kombinatının tikilməsi bu sahənin inkişafına səbəb olacaq. Tekstil sənayesinin inkişafı xammaldan asılıdır. Xammal da pambıqdır. Pambıq istehsalı ilə bağlı çox ciddi işlər görülür. İstehsal olunan pambığın həcminin ildən-ilə artması gözlənir".
Həmsöhbətimizin sözlərinə görə, məhsul daxili bazarda tələbatı ödəyərsə, qalan məhsulun ixracını təşkil etmək olar: "İxracın stimullaşdırılması istiqamətində dövlət tərəfindən çox ciddi addımlar atılıb. İxracın təşviqinə dair qərar qəbul olunub. "Made in Azerbaijan" brendinin dünyaya tanıdılması istiqamətində hökumətin çox ciddi işləri var. Bütün bunların hamısı qeyri-neft sektorunun inkişafı və ölkə iqtisadiyyatının neftdən asılılığının optimallaşdırılmasını hədəfləyir. Tekstil İstehsalçıları və İxracatçıları Assosiasiyası bu sahəyə olan diqqətin nəticəsidir".
Günel CƏLİLOVA
