Günel Fərhadqızı: "Göründüyü kimi, ölkəmiz neftdən gözəl yararlanmağı bacarıb"
Azərbaycan Prezidenti İlham Əliyev İstanbulda keçirilən 22-ci Dünya Neft Konqresində çıxışı zamanı bildirib ki, Azərbaycan Dövlət Neft Fondu dünyada mövcud olan neft fondları arasında ən şəffaflarından biridir və Birləşmiş Millətlər Təşkilatının da mükafatına layiq görülüb:
"Birinci şərt tam şəffaflıqdır. Neft Fondumuzda yığılan vəsaitlə bağlı məlumatlar mütəmadi qaydada ictimaiyyətə verilir. İkinci məsələ neftdən əldə edilən gəlirlərin düzgün istifadə olunmasıdır. Biz neftdən əldə edilən gəlirləri ilk növbədə infrastruktur layihələrinə yönəltdik. Bu gün biz nəinki nefti, qazı, eləcə də son illərdə tikdirdiyimiz onlarla elektrik stansiyasının istehsal etdiyi enerjini ixrac edirik. Biz sosial infrastruktur layihələrinə, məktəb və xəstəxanaların tikintisinə böyük vəsait ayırmışıq. Yoxsulluqla çox ciddi mübarizə aparırıq. Neft sektoru, əslində, çox iş yerləri yaradan sektor deyil. Buna baxmayaraq, biz neftdən əldə olunan gəlirləri digər sektorlara yönəldərək yoxsulluğu və işsizliyi aşağı səviyyəyə sala bildik və bu gün haradasa 5-6 faiz səviyyəsindədir. Yəni düzgün siyasət və düzgün addımlar nefti həm faydalı edə bilər, həm də bundan ölkələr problemlər görə bilər. Hesab edirəm ki, Azərbaycanın təcrübəsi uğurludur. Bizim ölkəmizə böyük həcmdə xarici sərmayə qoyulur və biz də, öz növbəmizdə, xarici ölkələrə sərmayələr qoyuruq. Burada birinci yerdə qardaş ölkə Türkiyədir: Türkiyənin enerji sektoruna bu günə qədər 10 milyard dollar sərmayə qoyulub. Növbəti illərdə bu rəqəm təxminən iki dəfə artacaq. Bir sözlə, bu gün enerji təhlükəsizliyi deyəndə bizim icra etdiyimiz layihələr yada düşür".
Prezident deyib ki, adətən, neftlə zəngin olmayan ölkələr düşünürlər ki, kaş bizdə də neft olaydı, biz də bundan istifadə edə bilərdik: "Amma mən deyə bilərəm ki, neft həm fayda gətirə bilər, həm də problem, başağrısı yarada bilər. Baxır neftdən necə istifadə edirsən. Biz Azərbaycanda çalışırdıq ki, "qara qızıl"ı insan kapitalına çevirək və hesab edirəm ki, buna nail olduq. Biz neftdən əldə edilən gəlirləri ilk növbədə çox şəffaf şəkildə qoruyuruq".
Göründüyü kimi, ölkə başçısı neftdən gələn gəlirlərdən düzgün istifadə ilə bağlı Azərbaycanın şəffaf modelini misal göstərib. Bu model və neft gəlirlərindən Azərbaycanın səmərəli istifadəsi barədə ekspertlər nə düşünür?
Ekspert Günel Fərhadqızı qəzetimizə açıqlamasında bildirdi ki, Azərbaycan neft gəlirlərindən səmərəli istifadəni bacaran ölkədir: "Prezident doğru qeyd edir ki, neft hamıya xoşbəxtlik gətirə bilməz. Ancaq Azərbaycan hakimiyyətinin reallaşdırdığı doğru strategiya nəticəsində biz neftdən yalnız xeyir görürük. 1994-cü il sentyabrın 20-də Bakıda dünyanın 7 ölkəsini təmsil edən 11 neft şirkəti ilə "Xəzər dənizinin Azərbaycan sektorunda "Azəri", "Çıraq" yataqlarının və "Günəşli" yatağının dərinlikdə yerləşən hissəsinin birgə işlənməsi və hasilatın pay bölgüsü haqqında" imzalanmış saziş yeraltı təbii sərvətlərimizdən xalqımızın rifahı naminə səmərəli istifadə olunmasına imkan yaratdı. Əsrlərdən bəri zəngin neft diyarı kimi tanınan ölkəmizin şanlı ənənələrinə əsaslanan "Əsrin müqaviləsi" Azərbaycanın iqtisadi qüdrətini və beynəlxalq nüfuzunu artırmaqla yanaşı, bir sıra parlaq zəfərlərə yol açdı.
Azərbaycan Respublikasının Prezidenti İlham Əliyevin daim qeyd etdiyi kimi, neft bizim üçün məqsəd deyil, ölkəmizin qarşıya qoyduğu məqsədlərə çatması üçün bir vasitə rolunu oynadı. Yeni neft strategiyasının uğurla reallaşdırılması iqtisadiyyatın sürətli inkişafına imkan yaratdı, əhalinin rifah halının yaxşılaşdırılması üçün ölkədə sosialyönümlü tədbirlərə diqqət artırıldı. Təkcə onu qeyd etmək kifayətdir ki, Azərbaycanda həyata keçirilən uğurlu iqtisadi strategiya nəticəsində son 15 ildə ümumdaxili məhsul, eləcə də sənaye istehsalı üç dəfədən çox artıb. Ölkənin maliyyə imkanlarının xeyli dərəcədə artması iqtisadiyyatın şaxələndirilməsi üçün geniş imkanlar yaratdı. Ötən illər ərzində neftdən əldə olunan gəlirlər hesabına iqtisadiyyatın şaxələndirilməsi, qeyri-neft sektorunun inkişafı istiqamətində konkret tədbirlər həyata keçirildi. Bunun da hesabına ümumdaxili məhsulda qeyri-neft sektorunun payı təqribən 70 faizə çatdırıldı. Göründüyü kimi, ölkəmiz neftdən gözəl yararlanmağı bacarıb".
Məhəmmədəli QƏRİBLİ
