Rəşad Həsənov: "Dövlət qurumları ilə müzakirələrin aparılması, səylərin birləşdirilməsi, təcrübələrin bölüşdürülməsi baxımından assosiasiyanın yaradılması vacibdir"
Mebel sənayesinin davamlı inkişafını təşkil etmək üçün Azərbaycanda Mebel Sənayeçiləri Assosiasiyası yaradılır. Bu barədə iqtisadiyyat nazirinin müavini Niyazi Səfərov bir neçə gün öncə Bakıda keçirilən "Assosiasiyaların rolunun artırılması: Azərbaycan-Türkiyə təcrübə mübadiləsi" mövzusunda tədbirdə bildirib.
O deyib ki, bu sahənin gələcək inkişafına təsir edəcək bir assosiasiya qurulur: "Hazırda assosiasiyanın hüquqi qeydiyyatı ilə bağlı tədbirlər həyata keçirilir. Assosiasiyaya sədrlik "Embawood"a veriləcək".
Nazir müavini Türkiyə Mebel Sənayeçiləri Assosiasiyası ilə gələcəkdə anlaşma memorandumunun imzalanacağını da qeyd edib. O bildirib ki, mebelin ixrac potensialının yaradılması həm Azərbaycan, həm də Türkiyə üçün önəmlidir: "Mebel bazarı rəqabətli bazardır. Bu sahənin inkişafı üçün ciddi səylər göstərilir. Müstəqillik dövrümüzdə iqtisadiyyatın təşkil olunması, bazar iqtisadiyyatının formalaşması üçün ciddi işlər görülüb. Digər sahələr olduğu kimi, mebel sahəsi də bazar iqtisadiyyatı şəraitində fəaliyyət göstərir".
O qeyd edib ki, mebel sənayeçilərinin səyi, əlverişli biznes mühiti nəticəsində mebel istehsalının həcmi ilbəil artır: "Düşünürük ki, bu tendensiya davamlıdır, çünki Azərbaycanda bu sahədə ixtisaslaşan müəssisələr formalaşıb. Deməli, bu sahə də özünü iqtisadi fəaliyyət sahəsi kimi təsdiq edib. Həmçinin Azərbaycanda mebel sənayesi üçün dəstək mexanizmləri var".
Mebel səneyesinin inkişafı üçün Mebel Sənayeçiləri Assosiasiyasının yaradılması barədə fikir bildirən iqtisadçı-ekspert Rəşad Həsənov "Bakı-Xəbər"ə açıqlamasında qeyd etdi ki, islahatlar aparılan zaman ölkədə belə bir assosiasiyanın yaradılması təklif olunmuşdu: "Mebel sənayesində problemlərin qruplaşdırılması uzun müddət idi ki, yaşanırdı. Dövlət qurumları ilə müzakirələrin aparılması, səylərin birləşdirilməsi, təcrübələrin bölüşdürülməsi baxımından assosiasiyanın yaradılması vacibdir. Mebel sənayesi ilə bağlı assosiasiyanın yaradılması növbəti dövrlərdə həm sənayenin inkişafı baxımından, həm də ixrac potensialının artırılması baxımından əhəmiyyətlidir.
Adıçəkilən sahədə assosiasiyanın yaradılması mebel sənayesində qeydə alınan problemlərin daha aktiv və qısa şəkildə üzə çıxarılması və həlli istiqamətində işlər görəcək.
Bu sektorda fəaliyyət göstərən ayrı-ayrı sahibkarlar ixrac imkanından yararlana bilmir. Baxmayaraq ki, onların məhsulları inkişaf etmiş ölkələr üçün ixrac qabiliyyətlidir. Əlaqələrin zəif olması və sənədləşmə prosedurlarının icrasında onlar üçün yaranan problemlər, həmçinin, sertifikatların əldə olunması sahəsində də çətinliklər qeydə alınır. Bu kimi problemlərin fərdi şəkildə həll olunması təbii ki, asan deyil. Nəticədə həmin müəssisələr istehsal etdikləri məhsulu ixrac etmək imkanından məhrum olur. Lakin assosiasiya bu kimi problemlərin kompleks şəkildə həll olunmasına öz təsirini göstərəcək".
İqtisadçının fikrincə, assosiasiyanın yaradılması gələcəkdə bu sektorun innovativ inkişafını şərtləndirə bilər. Ancaq yaxşı olar ki, yaranan qurum real olaraq fəaliyyət göstərsin.
Günel CƏLİLOVA
