Rəsul Cahangirli: "Bütün bu işlərin uğurla həyata keçirilməsi həm də o deməkdir ki..."
Azərbaycan Dövlət Neft Şirkəti (SOCAR) "Cənub Qaz Dəhlizi" şirkətinə əlavə 140 mln. manat investisiya yatırıb. Bu barədə "Ernst&Young" (EY) şirkəti tərəfindən auditi aparılmış SOCAR-ın konsolidasiya edilmiş maliyyə hesabatında qeyd olunub.
"Cənub Qaz Dəhlizi" QSC Azərbaycan Prezidentinin "Şahdəniz qaz-kondensat yatağının istismarının ikinci mərhələsi və "Cənub Qaz Dəhlizi"nin yaradılmasına dair digər layihələrlə bağlı bəzi tədbirlər haqqında" 25 fevral 2014-cü il tarixli Sərəncamı əsasında yaradılıb və səhmlərinin 51 %-i dövlət mülkiyyəti olmaqla İqtisadiyyat Nazirliyinə, 49 %-i isə SOCAR-a məxsus olan qapalı səhmdar cəmiyyətidir.
O da məlumdur ki, dünyanın potensial qaz ixracatçıları sırasında Azərbaycan mövqeyini getdikcə möhkəmləndirir. Eyni zamanda, regionun və Avropanın enerji xəritəsini zənginləşdirir, müstəqil iqtisadi siyasət yeridən ölkə kimi bir sıra qlobal enerji və nəqliyyat layihələrinin təşəbbüskarı və fəal iştirakçısı rolunda çıxış edir. Malik olduğu zəngin karbohidrogen ehtiyatları hesabına enerji təhlükəsizliyini tam təmin edən Azərbaycan həm də uzun illərdir Avropanın da enerji təhlükəsizliyinə mühüm töhfələr verir. Artıq uzun illərdir beynəlxalq əməkdaşlıq məkanı kimi qəbul edilən Xəzər hövzəsi malik olduğu zəngin karbohidrogen ehtiyatları hesabına bir sıra qlobal enerji layihələrinin reallaşdırıldığı mərkəz kimi də diqqət çəkir.
SOCAR-ın "Cənub Qaz Dəhlizi" şirkətinə əlavə olaraq 140 milyon manat investisiya yatırması Azərbaycanın öz öhdəliklərinə sadiq olmasını bir daha təsdiq edir.
Sözügedən məsələ ilə bağlı fikirlərini "Bakı-Xəbər"lə bölüşən ekspert Rəsul Cahangirlinin sözlərinə görə, Azərbaycan nəinki "Cənub Qaz Dəhlizi", bütün digər layihələrin reallaşdırılmasında öz öhdəliklərinə sadiq olub: "Bakı-Tiflis-Ceyhan neft, Bakı-Tiflis-Ərzurum qaz kəmərlərinin inşası zamanı Azərbaycan öz öhdəliklərinə artıqlaması ilə əməl edib. Həmçinin, Xəzərdə reallaşdırılan enerji layihələrinin ərsəyə gəlməsində Azərbaycan xarici neft şirkətlərinə yaxından kömək edib. Ümumilikdə Azərbaycanın yaxından yardımı olmasaydı, bu layihələrin heç biri reallaşmazdı. Yəni bu məsələdə nə mümkündürsə, onu Azərbaycan edir. Elə məsələlər var ki, Azərbaycanın iradəsi xaricindədir. "Cənub Qaz Dəhlizi" üzrə görülən işlər qrafik üzrə gedərsə, 2018-ci ildə qaz Türkiyə, 2020-ci ildə isə Avropa bazarına çıxarılacaq. Bütün bu işlərin uğurla həyata keçirilməsi həm də o deməkdir ki, Türkmənistanın zəngin qaz ehtiyatlarının Avropa bazarına çıxarılması üçün yeni imkanlar açılır. Bu da tranzit ölkə olaraq Azərbaycanın rolunu və əhəmiyyətini bir az da artıracaq. Ona görə də Azərbaycan daha çox maraqlıdır ki, sözügedən layihə tez və yaxud da vaxtında hazır olsun".
Vidadi ORDAHALLI
