Vüqar Bayramov: "Dünyaca məşhur "Coca-Cola" şirkətinin "İSMA BİKES" markalı velosipedlərə maraq göstərməsi sevindiricidir"
İsmayıllı Velosiped Zavodunun istehsalı olan "İSMA BİKES" markalı velosipedlər bazara yeni çıxsa da, artıq özünə çoxsaylı alıcı tapıb.
Azərbaycan Velosiped İdmanı Federasiyası ilə olduqca sıx əməkdaşlıq edən, "Olympic Moves Azerbaijan" hərəkatına yaxından dəstək verən, dünyanın ən məşhur brendlərindən olan "Coca-Cola" şirkəti ilə İsmayıllı Velosiped zavodu arasında artıq 200 ədəd "İSMA" velosipedinin alınması ilə bağlı müqavilə imzalanıb.
Bakı ilə İsmayıllıdan əlavə, Bərdədən və Lənkərandan olan iş adamları da bu zavodun məhsullarını almaq barədə razılığa gəlib.
"İSMA BİKES" markalı velosipedlərə dünyanın tanınmış şirkətlərinin maraq göstərməsi bu şirkətin istehsal etdiyi minik vasitəsinə gələcəkdə daha da böyük tələbatın olacağından xəbər verir.
İqtisadçı-ekspert Vüqar Bayramov "Bakı-Xəbər"ə açıqlamasında qeyd etdi ki, velosiped istehsalının təşkil olunması vacib idi: "Nəzərə almaq lazımdır ki, daxili bazarda belə velosipedə yüksək tələbat var. Tələb yüksək olduğu üçün, bu məhsulun istehsalı vacib idi".
Həmsöhbətimizin sözlərinə görə, dünyaca məşhur "Coca-Cola" şirkətinin "İSMA BİKES" markalı velosipedlərlə maraqlanması sevindiricidir: "Məşhur bir brendin Azərbaycan istehsalı olan velosipedi seçməsi onun keyfiyyətinin yüksək olmasına dəlalət edir. Bu hal digər şirkətlərin də gələcəkdə adıçəkilən markalı velosipedin alınması üçün müraciət etməsinə səbəb olacaq. Digər şirkətlərin "İSMA BİKES" markalı velosipedlərə maraq göstərməsi bunun keyfiyyət baxımından yüksək olması deməkdir. İstənilən məhsula marağın yüksək olması onun keyfiyyət baxımından əhəmiyyətli olmasının göstəricisidir. Keyfiyyətli məhsul istehsal etmək lazımdır ki, dünyanın aparıcı şirkətlərinin diqqətini cəlb edək".
Günel CƏLİLOVA
