İlham Şaban: "Daha geniş bir müstəvini özündə ehtiva edən tədbirdə Azərbaycanın da iştirak etməsi çox normal və ürəkaçandır"
İstanbul bu il reallaşdırılacaq 22-ci Dünya Neft Konqresinə (WPC) ev sahibliyi edəcək. Konqres 9-13 iyul tarixlərində İstanbulda keçiriləcək. Dünyanın aparıcı neft və qaz şirkətləri rəhbərlərinin iştirakı ilə keçiriləcək konqresdə Azərbaycan da təmsil olunacaq.
Qeyd edək ki, bu məsələyə iki ölkə başçısı arasında baş tutan telefon danışığı zamanı da toxunulub, Türkiyə-Azərbaycan dostluq və qardaşlıq münasibətlərinin müxtəlif aspektləri müzakirə edilib.
İstanbulda aparıcı neft və qaz şirkətləri rəhbərlərinin iştirakı ilə keçiriləcək konqres OPEK-ə alternativ sayıla bilərmi?
Neft məsələləri üzrə ekspert İlham Şaban qəzetimizə açıqlamasında bildirdi ki, Türkiyənin ev sahibliyi edəcəyi toplantı ilə bağlı qərar dərhal verilməyib: "Bu səbəbdən də burada hansısa sensasiya axtarmaq doğru olmazdı. Çünki sayca 22-ci olan bu toplantının gələcəkdə hansı ölkədə keçiriləcəyi İstanbul toplantısından sonra bilinəcək. Yəni demək istəyirəm ki, bu, ilk dəfə keçirilən format deyil. Öz ənənəsi, proqramı və məramı olan toplantıdır. 22-ci Dünya Neft Konqresinin OPEK-lə əlaqələndirilməsi də düz deyil. Hesab edirəm ki, bu tədbir nə OPEK-ə alternativdir, nə ona məhəbbət doğurur, nə də üçüncü bir hissi ifadə edir. Sadəcə, neft hasilatı ilə məşğul olan ölkələrin və onları əhatə edən şirkətlərin bir toplantısıdır. Bilirsiniz ki, neftlə bağlı dəngələr tez-tez dəyişir. OPEK konkret ölkələri əhatə edir və orada qəbul olunan qərarlar yalnız qurumda təmsil olunanlar üçün məcburi xarakter daşıyır. Bu toplantı isə bir qədər geniş arealı əhatə edir. Burada OPEK-ə üzv olan ölkələrlə yanaşı, olmayan dövlətlər də iştirak edə bilər. Ən maraqlısı isə budur ki, hətta neft ixracatçısı olmayan ölkələrin şirkət rəhbərləri də müzakirələrdə aktiv iştirak edir. Neftin hazırkı durumu, gələcəyi, həmin sahəni əhatə edən problemlər, onlardan çıxış yolları ətraflı müzakirə ediləcək. Daha geniş bir müstəvini özündə ehtiva edən tədbirdə Azərbaycanın da iştirak etməsi çox normal və ürəkaçandır. Bütün dünya üçün əhəmiyyətli olan toplantıdır. Çünki etiraf etməliyik ki, hazırkı reallıqlar çərçivəsində dünyanın taleyi neftdən çox asılıdır".
Məhəmmədəli QƏRİBLİ
