Turizm sektorunun inkişafı istiqamətində atılan addımlar artıq öz müsbət nəticələrini verməkdədir. İndi görülən işlər nəticəsində gözlənir ki, Azərbaycana nəzərdə tutulduğundan da çox turist gəlsin. Özü də təkcə ərəblərin hesabına yox. Son dövrlərdə olan vəziyyət Azərbaycana Rusiya istiqamətindən də gözlənildiyindən çox turist gəldiyini göstərir.
Elə bunun nəticəsidir ki, Rusiyanın müxtəlif vilayətlərindən Azərbaycana açılan aviareyslərin sayı durmadan artır. Məsələn, məlumat verildiyi kimi, bu günlərdə Krasnoyarsk vilayətinin Yemelyanov Beynəlxalq Hava Limanından Bakıya müntəzəm reyslərə start verilib. Azərbaycan paytaxtına uçuşları "İrAero" aviaşirkəti yerinə yetirir. Krasnoyarsk-Bakı marşrutu üzrə ilk uçuş isə ötən ayın sonlarında baş tutub. Bu istiqamət üzrə uçuşlar yay cədvəlinin sonunadək, yəni oktyabrın 25-dək davam edəcək.
Reyslər çərşənbə və bazar günləri olmaqla həftədə iki dəfə həyata keçirilir. Uçuşlar "Sukhoi Superjet 100" hava gəmisi vasitəsilə reallaşdırılır. Amma tələb yüksək olduğundan, Yemelyanov Beynəlxalq Hava Limanından Bakıya daha bir birbaşa müntəzəm reys açılıb. Yeni uçuşları "Nordwind" aviaşirkəti həyata keçirəcək. Reyslərə iyulun 19-dan start veriləcək və bu, 4 oktyabr tarixinədək davam edəcək. "Nordwind" aviaşirkəti hər həftə çərşənbə günləri uçuş təşkil edəcək. Aeroportun mətbuat xidmətindən verilən məlumata görə, uçuşlar "Boeing 737-800" tipli təyyarələr vasitəsilə həyata keçiriləcək. Yemelyanovo aeroportunun baş direktoru Andrey Mettslerin sözlərinə görə, Bakı Krasnoyarsk sakinləri arasında Yaxın Şərqin ən geniş yayılmış istiqamətlərindən biridir və bu istiqamətə tələbatın çox olacağına əminlik var. Beləliklə, ümumilikdə Krasnoyarskdan Bakıya uçuşların ümumi yerinə yetirilmə tezliyi yay cədvəli üzrə həftədə 3 reys təşkil edəcək.
Bundan başqa, digər reyslərlə yanaşı, hazırda "Azərbaycan Hava Yolları" QSC-nin aşağıbüdcəli brendi olan AZALJET Moskvanın "Vnukovo" Hava Limanından Gəncə və Qəbələyə müntəzəm reyslərin yerinə yetirilməsini həyata keçirir. Real vəziyyət göstərir ki, reyslərə tələb sürətlə artır və onların sayının artması qaçılmazdır. Avtobus, qatar və digər nəqliyyat vasitələri ilə Rusiyadan Azərbaycana gələn turistlərin sayında da dinamik artım qeydə alınır.
Eyni sözləri ərəb ölkələri, qonşu İran haqda da demək olar. İranın "Aysan Pərvaz" turizm şirkətinin baş direktoru Seyid Məhəmməd Mirrezayi bildirir ki, artıq Bakıya həftədə 6 reys yola salınır. Baş direktor bildirib ki, Bakıya səfər etmək istəyən iranlıların çoxluğu nəzərə alınıb və əlavə tədbirlər görülüb. İyun ayından başlayaraq şirkət, Tehran-Bakı-Tehran reysindən başqa, həftədə bir dəfə olmaqla Əhvaz-Bakı-Əhvaz, Məşhəd-Bakı-Məşhəd, İsfahan-Bakı-İsfahan, Urmiya-Bakı-Urmiya reyslərini də açıb. Mirrezayi qeyd etdi ki, İranın müxtəlif şəhərlərindən Bakıya səfər etmək istəyənlərin çoxluğu nəzərə alınıb və onların Bakıya turist səfərləri asanlaşdırılıb. Artıq Urmiyada, Məşhəddə, İsfahanda yaşayanların Bakıya getmək üçün Tehrana gəlmələrinə ehtiyac yoxdur. Adı çəkilən İran şəhərlərində beynəlxalq standartlara uyğun hava limanları var. Şirkət bu limanlardan istifadə edərək Bakı səfərlərini təşkil edir. Baş direktor onu da nəzərə çatdırıb ki, Bakıdan qayıdan iranlı turistlər heç bir nöqsanla qarşılaşmadıqlarını bildirir: "Digər səfər edən turistlər bəzi iradlarla bizə müraciət edir. Lakin Azərbaycana səfər edənlər heç vaxt şikayət etmir. Əksinə, Bakının gözəlliyindən, insanların mehriban olmasından və qiymətlərin münasibliyindən məmnuniyyətlə danışırlar".
Son vəziyyət göstərir ki, Azərbaycana gələn turistlərin sayı gedənlərin sayını üstələməyə başlayıb. Bunu Əli Əlirzayev də təsdiq edir: "Azərbaycanda turizmin inkişaf potensialı yüksəkdir. Rayonların sosial-iqtisadi inkişafı məsələləri həll olunur. Regionlarda turizm resursları zəngindir. Həmçinin regionlarda ev təsərrüfatları inkişaf edir, mənzil şəraiti yaxşılaşdırılır. Bu kimi hallar yerli əhalinin də istirahət üçün rayonlara üz tutmasına imkan yaradır. Nəqliyyat xidmətinin yaxşılaşması, otel təsərrüfatının inkişafı - bunlar hamısı daxili turizmin potensialını artırır. Əminliklə demək olar ki, Azərbaycanda gəlmə turizminin inkişafı getmə turizmini üstələməyə başlayıb". Azərbaycana gələn xarici turistlərin sayının artması bu xətlə ölkəyə daxil olan xarici valyutanın da həcmini əhəmiyyətli dərəcədə artırır. Artıq ölkəyə turizm xəttilə gələn xarici valyutanın miqdarında ötən illərə nisbətən ciddi artım müşahidə olunur. Ekspertlər bu həcmin daha da artacağını proqnozlaşdırır.
Tahir TAĞIYEV
