Ramil Osmanlı: "Bunu investisiya məqsədi üçün edirlər"
Daşınmaz əmlak bazarında müşahidə olunan durğunluğun gələn il aktivliklə əvəz olunacağı gözlənir. Bunu bir sıra faktorlar şərtləndirir. Bunun başlıca səbəblərindən biri dövlətin gələn il ərzində sosial evlərin inşası sahəsində genişmiqyaslı fəaliyyəti, həmçinin tikintidə aktivliyin artması məqsədilə atdığı digər addımlardır.
Daha bir maraqlı cəhət isə odur ki, ölkədə yaradılan investisiya şəraiti fonunda xaricdən də Azərbaycanın əmlak bazarına daxil olan vəsaitin miqdarı artır. Bunu o da təsdiqləyir ki, ölkədə ev alan xaricilərin sayı artır. Belə ki, 2011-ci ildə mənzil alan əcnəbi vətəndaşların sayı 1.265 nəfər təşkil edirdisə, 2015-ci ildə bu rəqəm 4.742-yə qalxıb. Bunlardan 702 nəfəri Bakı, 4040 nəfəri isə regionlar üzrə daşınmaz əmlaka sahib olub.
2016-cı ildə 3704 əcnəbi Azərbaycandan daşınmaz əmlak (mənzil, bağ evi, torpaq və s.) alıb. Bu il Bakıdan ev alan əcnəbilərin sayı 958 nəfərdir. 2746 əcnəbi ölkə vətəndaşı isə respublikanın digər yerlərində daşınmaz əmlaka sahib olub. Azərbaycanda ən çox daşınmaz əmlak sahibi olan əcnəbilər Rusiya, Türkiyə, ərəb ölkələri, MDB ölkələri və Avropa ölkələrindən olan vətəndaşlardır.
Azərbaycanda daşınmaz əmlak alan əcnəbilərin sayının artması nəyin göstəricisidir?
Sözügedən məsələ ilə bağlı fikirlərini "Bakı-Xəbər"lə bölüşən əmlak məsələləri üzrə ekspert Ramil Osmanlı bunu bir sıra amillərlə əlaqələndirdi: "Burada müxtəlif səbəblər var. Səbəblərdən biri son illər Azərbaycanda əmlakın dəyərinin düşməsidir. Əvvəlki illərdə müəyyən qədər vəsait qoyub əmlak alanlar indi həmin əmlakın təqribən 70 faizi həcmində vəsait qoyub daşınmaz əmlak sahibi ola bilir. Digər tərəfdən, investisiya mühiti o qədər də ürəkaçan olmasa da, hər halda, yeni tikililərdə, ilkin qeydiyyat aparılmayan əmlaklarda investisiya cəlbediciliyi yüksəkdir. Xüsusilə mənzil və qeyri-yaşayış sahələrində, yeni tikililərdə qiymətlərin artması müşahidə olunur. Məsələn, üç il əvvəl metronun "Həzi Aslanov" stansiyası ətrafında yeni tikilinin bir kvadratmetrini təqribən 600 manata əldə etmək mümkün idisə, bu gün bu rəqəm 850 manatdan yuxarıdır. O cümlədən, qeyri-yaşayış sahələrində də vəziyyət bənzərdir. İki-üç il əvvəl Xırdalanda mənzilin bir kvadratmetrini 400-450 manata almaq mümkün idisə, bu gün həmin rəqəm 650 manatdan yüksəkdir. Şəhərin mərkəzində mənzillərin bir kvadratmetri 1500-3000 manat arasında dəyişirdisə, bu gün minimum 2000 manatdan başlayıb hətta bəzi yerlərdə 7-8 min manata qədər artır. Bu səbəbdən xaricdə yaşayan və oranın vətəndaşı olan azərbaycanlılar Azərbaycanda daşınmaz əmlak alır. Yeni tikilidə mənzil alırlar və bir müddətdən sonra daha baha qiymətə satmaq məqsədi güdürlər. Yəni investisiya məqsədilə əmlak alırlar. Deməyim odur ki, alınan əmlakın əksər hissəsi yaşayış məqsədi üçün alınmır".
Vidadi ORDAHALLI
