Müslüm İbrahimov: "Dövlət istiqrazlarının satışının artması və səhm portfelinin yaradılması..."
Azərbaycanda maliyyə xidmətləri sahəsində 1600 iş yeri yaradıla bilər. Bu barədə Azərbaycan Prezidentinin 2016-cı il 6 dekabr tarixli Fərmanı ilə təsdiq edilmiş "Azərbaycan Respublikasında maliyyə xidmətlərinin inkişafına dair Strateji Yol Xəritəsi"ndə deyilir.
Qeyd olunur ki, maliyyə xidmətləri sektorunda prioritetlərin həyata keçirilməsi nəticəsində 2020-ci ildə real ÜDM-in 750 milyon manat dəyərində artacağı, maliyyə xidmətləri sektorunda 1600 iş yerinin yaradılacağı proqnozlaşdırılır.
"Yol xəritəsi"nə əsasən, maliyyə xidmətlərinin inkişafı ilə bağlı nəzərdə tutulan tədbirlər üzrə 2020-ci il üçün aşağıdakı əsas hədəf indiqatorları müəyyən edilib:
- bank sektorunun gəlirliliyinin 2015-ci ilə nəzərən 7 faiz artması;
- 2020-ci ilədək fond birjasında listinqə mühüm sektorlardan əlavə 5 şirkətin çıxması;
- maliyyə dərinliyinin (kreditlərin qeyri-neft ÜDM-ə nisbətinin) 60 faiz təşkil etməsi;
- qeyri-işlək kredit əmsalının 8 faizədək azaldılması;
- sığorta penetrasiyasının (sığorta haqlarının qeyri-neft ÜDM-ə nisbətinin) 1,4 faizə çatması.
Maliyyə xidmətləri sahəsində 1600 iş yerinin açılması barədə fikir bildirən iqtisad elmlər doktoru Müslüm İbrahimov "Bakı-Xəbər"ə açıqlamasında qeyd etdi ki, bu, ilk növbədə, ölkə iqtisadiyyatına müsbət təsir edəcək: "Dövlət xərclərinin artırılması, infrastrukturun yaradılması iş yerlərinin açılmasına səbəb olur".
Həmsöhbətimiz hesab edir ki, ölkə başçısı İlham Əliyev tərəfindən təsdiq olunan "Strateji Yol Xəritəsi" yeni bir nəfəs deməkdir.
Müsahibimiz qeyd etdi ki, iş yerlərinin açılması ilə istehsal artacaq. İstehsalın artımı isə iqtisadiyyatın canlanmasına səbəb olacaq.
Ekspertin sözlərinə görə, xarici təcrübəyə əsasən, milli iqtisadiyyatın inkişafında bələdçi rolunu oynayan "Strateji Yol Xəritəsi" postböhran mərhələsinə qədəm qoymuş və sabit makroiqtisadiyyata malik ölkələrdə tətbiq olunur: "Son illər neft gəlirlərinin azalması və nəticədə milli valyutanın kəskin devalvasiyaya uğraması illərlə sabit vəziyyətdə saxlanan makroiqtisadi tarazlığın pozulmasına gətirib çıxarıb. Hazırda dövlət inflyasiyanı nəzarətdə saxlamaq üçün sərt monetar siyasət həyata keçirir. Lakin qısamüddətli təsiredici gücə malik monetar və fiskal siyasətin alətləri uzun müddətə nəzərdə tutulmuş davamlı iqtisadi inkişaf tempinin artmasına yararlı deyil. Yalnız qısamüddətli sabitlik vəziyyətində, ilk növbədə, staqflyasiya prosesini müəyyən dərəcədə ləngitmək olar. Bu da istehsalın restrukturizasiyasına yönəldilmiş strateji layihələrin həyata keçirilməsinə və keyfiyyət baxımından iqtisadi artıma nail olmasına münbit şərait yaradır".
İqtisadçı hesab edir ki, bu qərarla kənd təsərrüfatı məhsulları sığortalanacaq: "Aqrar məhsulların sığorta olunması maliyyə sektorunda yeni iş yerlərinin açılmasına səbəb olacaq. Həmçinin, faiz dərəcəsinin artması nəticəsində qoyulan əmanətlərin həcmi artacaq. Dövlət istiqrazlarının satışı artacaq və səhm portfelinin yaradılması maliyyə sektorunda iş yerlərinin açılması deməkdir".
Günel CƏLİLOVA
