Vüqar Bayramov: "Bu, iki ölkə arasında iqtisadi-ticarət əlaqələrinin daha da inkişafına xidmət edəcək"
Ankara Azərbaycanla gömrük prosedurlarının sadələşdirilməsini və Rusiya ilə Türkiyə arasında mövcud dəhliz kimi "Yaşıl dəhliz" yaradılmasını qarşısına hədəf qoyub. Bunu mətbuata açıqlamasında Türkiyənin gömrük və ticarət naziri Bülənt Tüfənkçi deyib.
Nazir deyib ki, Gömrük və Ticarət Nazirliyi Türkiyənin rəqabət qabiliyyətliliyinin artırılması məqsədilə türk məhsullarının yeni bazarlara çıxması üçün gömrük prosedurlarını sadələşdirmək və sürətləndirmək niyyətindədir: "Türkiyə ticarət prosedurlarının sadələşdirilməsi üçün ÜTT sazişinə də qoşulub. Bu, bizim iş adamları üçün böyük imkanlar yaradır".
Onun sözlərinə görə, yaxın illərdə Azərbaycanla Türkiyə arasında ticarət dövriyyəsinin 15 milyard dollara çatdırılması nəzərdə tutulur.
Nazir qeyd edib ki, Azərbaycan Türkiyə iqtisadiyyatına investisiya qoyan Mərkəzi Asiya və Qafqaz ölkələri arasında liderlik edir: "Əsas investor Azərbaycan Dövlət Neft Şirkətidir. Türkiyə və Azərbaycan TANAP-ın ən iri investorlarındandır. Bundan başqa, Azərbaycan otel biznesi, xəstəxana tikintisi və tibbi sahələrdə investisiyalara malikdir".
Məlumat üçün qeyd edək ki, Prezident İlham Əliyev bu il mayın 21-də "Malların və nəqliyyat vasitələrinin gömrük sərhədindən keçirilməsi üçün "Yaşıl dəhliz" və digər buraxılış sistemlərindən istifadə Qaydaları" və onun təsdiq edilməsi barədə fərmanlar imzalayıb. Yəni sözügedən sistemin Azərbaycanda olması və iki ölkə arasında tətbiq edilməsi ticarət əlaqələrinin artmasına ciddi təkan verəcək. Hər iki ölkə iqtisadiyyatı bundan faydalanacaq.
Maraqlıdır, bəs ekspertlər iki ölkə arasında "Yaşıl dəhliz"in yaradılması təşəbbüsünə necə baxır? Bu sistemin hansı üstünlükləri var? Məsələyə münasibət bildirən iqtisadçı-ekspert Vüqar Bayramovun fikrincə, "Yaşıl dəhliz" prinsipi ondan ibarətdir ki, sahibkar elektron idxal bəyannaməsi tərtib edəcək, sonra bəyannamənin risq qiymətləndirilməsi aparılacaq: "Həmin malların ölkəyə gətirilməsi "Yaşıl dəhliz" prinsipinə uyğundursa, bu zaman sənədlərin rəsmiləşdirilməsi sahibkarın elektron idxal bəyannaməsinə əsasən həyata keçiriləcək və həmin dəhlizdən istifadə edən sahibkarın malı yoxlanılmadan ölkəyə buraxılacaq. Bu addım həm sahibkarın mövqeyinin və rolunun artmasına, həm də proseslərin elektronlaşmasına xidmət edəcək. Bu prinsipin tətbiq edilməsi gömrük sistemində yeni bir mərhələnin başlanğıcı kimi də qiymətləndirilə bilər. Belə olarsa, iki ölkə arasında bəyannamələr yalnız elektron formada olacaq. Sahibkar sənədləri "Yaşıl dəhliz"dən istifadə üçün verirsə, deməli, onun gömrük məmurları ilə ünsiyyəti minimuma enəcək. "Yaşıl dəhliz" qaydalarının üstünlüyü odur ki, gömrük prosedurlarının sayı azalacaq, sahibkar məmurlarla, demək olar ki, ünsiyyətdə olmayacaq. Çünki "bir pəncərə" sistemi tətbiq olunacaq. Bu da korrupsiya hallarının azalması və sahibkarların fəaliyyətinə müdaxilənin minimuma enməsi baxımından olduqca vacibdir. Şəffaflıq artacaq, ən önəmlisi, gözləmələrin, növbələrin, yubanmaların sayında xeyli azalmalar müşahidə olunacaq. Bu, iki ölkə arasında iqtisadi-ticarət əlaqələrinin daha da inkişafına xidmət edəcək".
Vidadi ORDAHALLI
