"Azərbaycan Respublikasında 2024-cü il üçün yaşayış minimumu" haqqında Qanununa əsasən, gələn il üçün yaşayış minimumu ölkə üzrə 270 manat, əmək qabiliyyətli əhali üçün 287 manat, pensiyaçılar üçün 222 manat, uşaqlar üçün 235 manat məbləğində müəyyən edilib.
2024-cü ilin yanvarın 1-dən etibarən Azərbaycanda alimentin minimum miqdarı 235 manat olacaq.
Məlumat üçün bildirək ki, 2023-cü il üçün yaşayış minimumu ölkə üzrə 246 manat, əmək qabiliyyətli əhali üçün 261 manat, pensiyaçılar üçün 199 manat, uşaqlar üçün 220 manat məbləğində təyin edilmişdi.
Maraqlıdır, yaşayış minimumunun artırılmasının nə kimi sosial əhəmiyyəti var? Ümumiyyətlə, ölkədə təxminən neçə faiz əhali bu kateqoriyaya aiddir?
"Yaşayış minimumu və ehtiyac meyarının artırılması sosial yardımların da artmasına səbəb olacaq"
Milli Məclisin İqtisadi siyasət, sənaye və sahibkarlıq komitəsinin üzvü Aydın Hüseynov "Bakı-Xəbər"ə açıqlamasında qeyd etdi ki, yaşayış minimumu və ehtiyac meyarı əhalinin yaşayış ehtiyacları normalarına əsasən müəyyən edilir. Yaşayış minimumu minimum istehlak səbətinin dəyəri və icbari ödənişlərin cəmindən ibarət sosial normadır. Yaşayış minimumu hesablanarkən bütün istehlakla bağlı həmin normalar hesablanır. 2023-cü ildən yaşayış minumumu ilə ehtiyac meyarı bərabərləşdirilib, hər iki sosial norma eyni həddə müəyyən edilərək artırılır: "2024-cü ildə 9,7 faiz götürülməsi onunla bağlıdır ki, gələn il inflayasiya 6 faiz gözlənilir. Ehtiyac meyarı ünvanlı dövlət sosial yardımının təyin edilməsi məqsədilə müəyyən edilir və ehtiyac meyarının həddi artdıqca ünvanlı yardım məbləği də eyni ölçüdə artırılır. Bu o deməkdir ki, gələn il ünvanlı yardım da 9,7 faiz aratacaq".
Millət vəkilinin sözlərinə görə, 2024-cü ildə minimum əmək haqqının 345 manat həddində olması nəzərdə tutulur. Azərbaycanda həyata keçirilən sosial siyasətin mərkəzində vətəndaşların sosial rifahının yaxşılaşdırılması, keyfiyyətli həyat şəraitinin təmin edilməsi dayanır. Son 4 ildə qəbul olunaraq icra edilən sosial paketlər çərçivəsində əhalinin sosial müdafiəsinin gücləndirilməsini təmin edən mühüm sosial artımlar baş verib. Minimum əməkhaqqı son 4 ildə 4 dəfə artırılaraq 130 manatdan 345 manata qaldırılıb. Bu artımlar yüz minlərlə insanın maaşlarının artımına səbəb olub.
A.Hüseynov qeyd etdi ki, gələn il Dövlət Sosial Müdafiə Fondunun 2024-cü il büdcəsinin gəlirləri və xərcləri 6 milyard 919 milyon manat məbləğində proqnozlaşdırılır. Bu, 2023-cü ilə nisbətən 10,4 faiz və ya 651 milyon manat çoxdur: "Bu isə o deməkdir ki, gələn il təkcə Fonddan pensiya və təqaüdlərin artımları üçün əlavə olaraq 650 milyon manat ayrılacaq. Beləliklə, dövlət və icmal büdcələrində sosial təminatla bağlı xərclərin məbləği təxminən 700 milyon manat artırılacaq ki, bu da bir çox sosial sahələrdə əlavə artımların maliyyə təminatı üçün əsas mənbə olacaqdır. İlk növbədə pensiyalar artacaq, bu rəqəm ilin sonunda ölkə üzrə orta aylıq əməkhaqqının artım əmsalı əsasında məlum olacaq. Hazırda orta aylıq əməkhaqının orta artımı 1 faizdir. Bu da o deməkdir ki, pensiyalar ən azı 11 faiz artacaq. Növbəti ilin əvvəlində orta aylıq pensiya məbləğinin təxminən 435-440 manat həddində olacağı gözlənilir".
Günel CƏLİLOVA
