Azərbaycanın Qarabağ bölgəsində yaşayan erməni sakinlərin reinteqrasiyası çərçivəsində Azərbaycan Respublikasının milli valyutasının tam tədavülə keçməsi təmin edilir. Bu barədə Azərbaycan Respublikası Prezidentinin Administrasiyası məlumat yayıb.
Məlumatda qeyd edilir ki, sakinlərin yaşadıqları ərazilərdə sahibkarlıq fəaliyyəti üçün dəstək tədbirləri həyata keçirilir. Ölkədə sahibkarlıq subyektlərinin maliyyəyə çıxış imkanlarının artırılması ilə bağlı tətbiq olunan güzəştli kreditlər, faizlərin subsidiyalaşdırılması, kreditlərə zəmanətin verilməsi və digər maliyyə alətləri sakinlərin yaşadıqları ərazilərə şamil olunur.
Fermerlərə subsidiyalar verilir və onlar, torpaq vergisi istisna olmaqla, bütün vergilərdən azad edilir.
Bununla da Qarabağ bölgəsində Azərbaycan Respublikasının milli valyutasının tam tədavülə keçməsi təmin edilir.
“Mərkəzi Bank və digər qurumlar bu bölgələrdə bank şəbəkələri və filialları, bankomatlar quraşdıracaq və erməni sakinlərə bank kartları veriləcək”
Bunun əhəmiyyəti haqqında danışan millət vəkili Aydın Hüseynov “Bakı-Xəbər”ə açıqlamasında qeyd etdi ki, artıq Azərbaycan Respublikasının Qarabağ bölgəsində yaşayan erməni sakinlərin Azərbaycan cəmiyyətinə dayanıqlı reinteqrasiyasının təmin olunması və Azərbaycan dövlətinin himayəsindən istifadə etmələrinə imkan yaradılması məqsədilə onların sosial, humanitar, iqtisadi və infrastruktur məsələlərinin həlli istiqamətində təxirəsalınmaz tədbirlərə başlanılıb və erməni sakinlərimizin bütün sosial-iqtisadi ehtiyacları öyrənilərək zəruri addımlar atılır. Bu məsələlərlə məşğul olan İşçi qrup müvafiq tapşırıqlar çərçivəsində işlər görülür, ermənilərin vətəndaşlıq məsələlərinin həlli, sosial təminat və iqtisadi proseslərə inteqrasiyası, digər işlər müsbət yöndə həll olunmaqdadır: “Dövlət Miqrasiya Xidmətinin, Əmək və Əhalinin Sosial Müdafiəsi Nazirliyinin əməkdaşları Qarabağ iqtisadi rayonunda fəaliyyəti davam etdirirlər. Həmin sakinlərlə ilkin sosial-psixoloji, sosial xidmətlərə, reabilitasiya xidmətlərinə dair qiymətləndirmə aparılıb, onların ehtiyacları müəyyənləşdirilib. Qiymətləndirmə zamanı sosial-psixoloji maarifləndirmə işi aparılıb, əlillik və reabilitasiya xidmətlərinə dair məsləhətlər verilib. Bütün bunlar artıq ermənilərin Azərbaycan cəmiyyətinə inteqrasiyasının uğurla start götürdüyünü təsdiq edir”.
Millət vəkilinin sözlərinə görə, Azərbaycanın Qarabağ bölgəsində yaşayan erməni sakinlərin reinteqrasiyası çərçivəsində Azərbaycan Respublikasının milli valyutasının tam tədavülə keçməsi də təmin edilir. Sözsüz ki, manat Azərbaycanda yeganə tədavül vasitəsidir və Azərbaycan milli valyutası azad edilmiş bütün ərazilərdə vahid pul vahidi kimi işlənməkdədir. Laçın, Zəngilan, Füzuli və digər ərazilərdə bir müddətdir ki, manat yeganə tədavül vasitəsi kimi işlənilir və həmin bölgələrdə olduğu kimi Xankəndi, Əsgəran, Ağdərə, Xocalı və digər ərazilərdə də manatın tədavülünün təmin edilməsi üçün arxitaektura qurulur. Mərkəzi Bank və digər qurumlar bu bölgələrdə bank şəbəkələri və filialları, bankomatlar quraşdıracaq və erməni sakinlərə bank kartları veriləcək, onlara pensiya və təqaüdlər manatla ödəniləcək, gələcəkdə işlə təmin olunanlar da eyni qaydada Azərbaycan manatı ilə pullarını alacaqlar. Eyni zamanda, bu ərazilərdə bütün ödəniş əməliyyatları, alış-veriş və digər tədavül prosesləri məhz manatla aparılacaq.
A.Hüseynov onu da əlavə etdi ki, Qarabağda yaşayan ermənilərin yaşadıqları ərazilərin iqtisadi inkişafın sürətləndirilməsi məqsədilə tətbiq edilən xüsusi iqtisadi rejimlə bağlı təşviq paketi, o cümlədən vergi və gömrük güzəştləri onlara da şamil olunacaq. Onlara da digər Azərbaycan vətəndaşları kimi sahibkarlıq və fərdi biznes məqsədilə Azərbaycan manatı ilə kreditlər veriləcək.
Günel CƏLİLOVA
