Bu günlərdə Aqrar Sığorta Fondunun idarə heyətinin sədri Fuad Sadıqov verdiyi açıqlamasında kənd təsərrüfatı sahəsində fəaliyyət göstərən sahibkarlıq subyektlərinin qorunması üçün tələb olunan sığorta ödənişlərinin elə də yüksək olmadığını bildirib.
1000 manatlıq taxıl məhsulunu qorumaq üçün cəmi 10-11 manat məbləğində sığorta ödənişi tələb edildiyini deyən F.Sadıqovun sözlərinə görə, meyvə bağlarının sığortalanmasında bu məbləğ 1000 manatlıq məhsul üzrə 15-20 manat arasında dəyişir.
Bir çox hallarda fermer və sahibkarlar bu məbləğin yüksək olduğunu və onlara sərf etmədiyini bildirir. Maraqlıdır, fermerlər aqrar sığortadan niyə şikayət edir?
“Hazırda fermerlərin sığortadan qaçmasının əsas səbəbi inamsızlıqdır, onlar sığorta şirkətlərinə etibar etmir”
Aqrar sahə üzrə ekspert Akif Nəsirli “Bakı-Xəbər”ə açıqlamasında qeyd etdi ki, məhsulun sığortalanması üçün 10 faiz sığorta haqqı tələb olunur. Hazırki şəraitdə sığorta ödənişi üçün müəyyən olunan qiymətlər münasibdir: “Sığorta şirkətləri bu sahə ilə bağlı geniş reklam işlərilə məşğul olmalı, özfəaliyyətlərini də genişləndirməlidir. Vətəndaşlar sığorta şirkətlərinin fəaliyyətindən məmnun qalmalıdır. Kəndli görməlidir ki, qonşusu, qohumu və ya hansısa fermerin başına sığorta hadisəsi gəldi, sığorta şirkəti də həmin olayı şəxsi razı salan formada həll etdi. Bundan sonra kəndlidə sığortaya inam yarana bilər. Hazırda fermerlərin sığortadan qaçmasının əsas səbəbi inamsızlıqdır. Onlar sığorta şirkətlərinə etibar etmir. Bu səbəbdən də fermerlər sığortaya yönələn xərcləri itirilmiş məbləğ adlandırırlar. Bu gün onlar “heç bir hadisə baş verə bilməz” düşüncəsi ilə yaşayırlar. Digər tərəfdən isə fikirləşirlər ki, əgər taxıl və ya hansısa sahələrini sel məhv edərsə, sığortaya çəkilən xərcə rəğmən, dəyən ziyan ödənilməyəcək. Sığorta bazarı son illərdə çox həssaslaşıb. Buraya daxil olan ilk növbədə özünü təsdiq etməlidir. Belə ki, fermer həm sığorta hadisəsini, həm baş verən itkinin hesablanmasını, həm də sığorta şirkəti tərəfindən qarşılanmasını gözləri ilə görməlidir. Fermerlərin sığorta marağını artırmaq üçün sığorta şirkətləri aktiv fəaliyyət göstərməlidir”.
Həmsöhbətimiz onu da əlavə etdi ki, Azərbaycanda 400 min hektara yaxın torpaq sahəsi sığortalanıb. Ancaq ölkənin əkinə yararlı torpaq sahəsi o qədər də çox deyil.
Günel CƏLİLOVA
