Vüqar Bayramov: “Görülən işlər yükdaşımalar üçün yeni imkanlar deməkdir”
“Mərkəzi Asiyadakı qardaşlarımız bilirlər ki, Azərbaycanın bütün nəqliyyat-logistika infrastrukturu onlar üçün açıqdır”. Bunu Prezident İlham Əliyev Tacikistanda keçirilən Mərkəzi Asiya Dövlət Başçılarının 5-ci Məşvərət görüşündə çıxışı zamanı deyib.
Ölkə başçısının sözlərinə görə, nəqliyyat və logistika sahəsi münasibətlərimizdə mühüm yer tutur: “Azərbaycan Mərkəzi Asiya ölkələri üçün Türkiyə və Avropa bazarları istiqamətində etibarlı tranzit ölkəsidir. Əks istiqamətdə tranzitin əhəmiyyəti də az deyil. Mərkəzi Asiyadakı qardaşlarımız bilirlər ki, Azərbaycanın bütün nəqliyyat–logistika infrastrukturu onlar üçün açıqdır. Şərq-Qərb marşrutu ilə yükdaşımalarına artan tələbatı təmin etmək məqsədilə Bakı-Tbilisi-Qars dəmir yolu tərəfimizdən müasirləşdirilir. Gələn il həmin yol ilə daşınan yüklərin həcmi 1 milyon tondan 5 milyon tona qədər artırılacaq. Buna paralel olaraq, Bakı Ticarət Limanının imkanları bugünkü 15 milyon tondan 25 milyon tona qədər artırılır. Azərbaycan Xəzərdə 50-dən artıq gəmidən ibarət ən iri ticarət donanmasına malikdir. Mərkəzi Asiya ölkələrindən yük göndərənlərin artan tələbatını nəzərə alaraq, biz gəmiqayırma zavodunun imkanlarının genişləndirilməsi üzərində fəal çalışırıq”.
Maraqlıdır, Prezidentin məlum fikirləri Mərkəzi Asiya dövlətlərinin Avropaya doğru ixrac prosesinə necə təsir göstərəcək?
- “Mərkəzi Asiya ölkələrinin Azərbaycan üzərindən Türkiyə və eləcə də Avropa ölkələrinə ixracında artımlar olacaq”
Məsələ ilə bağlı “Bakı-Xəbər”ə açıqlama verən millət vəkili Vüqar Bayramovun fikrincə, bütün bunlar Mərkəzi Asiya ölkələri üçün yeni imkanlar açacaq: “Əvvəla, Azərbaycan Mərkəzi Asiya dövlətləri ilə strateji münasibətlərə malikdir və son illərdə əlaqələr genişlənir. Mərkəzi Asiya ölkələri ilə həm siyasi, həm də iqtisadi əlaqələrimiz kifayət qədər dərinləşir. Bu ölkələrin nəqliyyat və logistika sahəsində əməkdaşlıq baxımından böyük potensialı var. Məsələ ondadır ki, bir tərəfdən son illər Azərbaycan nəqliyyat infrastrukturunun inkişafına kifayət qədər böyük həcmdə sərmayə yönəldib. Digər tərəfdən, aparılan instisional islahatlar da Azərbaycan üzərindən Orta Asiya dövlətləri üçün yükdaşımaların həcmini artırılmasına imkan yaradır. Yəni, bununla bağlı kompleks və sistemli tədbirlər görülür. Digər tərəfdən Şərq-Qərb marşrutu ilə yükdaşımalarına artan tələbatı təmin etmək məqsədilə Bakı-Tbilisi-Qars dəmir yolunun ötürücülük qabiliyyəti artırılır. Gələn il həmin yol ilə daşınan yüklərin həcmi 1 milyon tondan 5 milyon tona qədər artırılacaq. Buna paralel olaraq, Bakı Ticarət Limanının imkanları 15 milyon tondan 25 milyon tona qədər artırılır. Bütün bunlar çox ciddi göstəricidir. Nəticə etibari ilə görülən işlər yükdaşımalar üçün yeni imkanlar deməkdir. Bu baxımdan gözlənilir ki, Mərkəzi Asiya ölkələrinin Azərbaycan üzərindən Türkiyə və eləcə də Avropa ölkələrinə ixracında artımlar olacaq. Bu, həm Azərbaycanla nəqliyyat logistika sahəsində Mərkəzi Asiya ölkələri arasında qurulmuş və dərinləşmiş əlaqələrlə bağlıdır. Digər tərəfdən isə, Orta Dəhlizin inkişaf etdirilməsi də diqqət mərkəzindədir. Nəzərə almaq lazımdır ki, Avropa İttifaqının Orta Dəhlizə marağı artmaqdadır. Ona görə də son proseslər bir daha təsdiq edir ki, Azərbaycan Mərkəzi Asiya ölkələri üçün ixrac potensialının genişləndirilməsi baxımından əsas tərəfdaşlardan birinə çevrilməkdədir”.
Vidadi ORDAHALLI
