Bakı ilə müqayisədə regionlarda yaşayan vətəndaşlarımız banklardan krediti çətinliklə alır. Mərkəzi Bankın məlumatına görə, bu ilin 31 iyul tarixinə Azərbaycanda kredit portfelinin həcmi 21 milyard 372 milyon manat olub. Kreditlərin -54.4% faizi biznes təyinatlıdır. İstehlak kreditləri - 29.8%, ipoteka kreditləri - 15.8% təşkil edib.
Bu, əvvəlki aylarla müqayisədə artım hesab edilsə də, regionlara düşən pay hələ də ürəkaçan deyil. Belə ki, ümumi kredit portfelinin 16 milyard 336 milyon manatı Bakıda qeydə alınıb. Banklar ötən illərdə olduğu kimi, yenə də bölgələrdə yaşayan vətəndaşlara kredit verməkdə elə də maraqlı deyil. Təbii ki, bu da rayonlarda yaşayan əhalinin məşğulluq səviyyəsinə təsir edir.
“Banklar əksər hallarda kredit ayıran zaman paytaxtda girov tələb edirlər ki, əksər yerli sahibkarların bu imkanları olmur”
Iqtisadçı ekspert Kamran Məmmədli “Bakı-Xəbər”ə açıqlamasında qeyd etdi ki, hələ də banklar bölgələri maliyyələşdirməkdə maraqlı deyil: “Mərkəzi Bankın məlumatına görə, bu il Azərbaycanda kredit portfelinin həcmi 21 milyard 372 milyon manat olub. Bunun 16 milyard 336 milyon manatı Bakının payına düşür. Bu o deməkdir ki, ümumi kredit qoyluşunun 77 faizindən çox yalnız Bakı şəhərinin payına düşür. 805 milyon manat isə Abşeron-Xızı iqtisadi rayonunda təklif olunub. Beləliklə, bankların verdiyi hər 100 manat kreditin 80 manatından çox Bakı və Abşeronun payına düşür. Açıqlanan rəqəmlərdən də bəlli olur ki, regionların kreditlərə çıxış imkanları məhdud olaraq qalmaqdadır”.
Ekspertin sözlərinə görə , banklar əksər hallarda kredit ayıran zaman paytaxtda girov tələb edirlər ki, əksər yerli sahibkarların bu imkanları olmur. O baxımdan, girov mexanizmi təkmilləşdirilməli və regionlarda fəaliyyət göstərən sahibkarlar üçün güzəştli kreditləri həcmi artırılmalıdır. Regionlarda fəaliyyət göstərən sahibkarların ucuz kreditlərə çıxış imkanları artırılmalıdır. Eyni zamanda, kredit üçün müraciət edən şəxs iş yerini göstərə bilmirsə onun kredit almaq ehtimalı azalır. Bu da bölgə sakinlərinin kreditə çıxış imkanlarını azaldır.
Günel CƏLİLOVA
