Rusiya və Ukrayna arasında baş verən hadisələr Azərbaycanın tikinti sektoruna da öz təsirini göstərdi. Son illər tikinti materiallarının qiyməti sürətlə artırdı. Ancaq son zamanlar tikinti bazarında fərqli mənzərə müşahidə olunur.
Tikinti materiallarının qiyməti ötən ayla müqayisədə ucuzlaşıb. Maraqlıdır, tikinti materiallarının qiyməti niyə ucuzlaşıb?
“Bazarda bolluq yaranan zaman satıcılar materialları maya dəyərindən də aşağı qiymətə satmağa məcbur olur”
Daşınmaz əmlak məsələləri üzrə ekspert Ramil Qasımzadə bildirdi ki, bu il Azərbaycanın tikinti materialları bazarında qiymətlər ötən illə müqayisədə xeyli aşağı düşüb. Bu bazarın strukturu elədir ki, qiymətlər hər an dəyişə bilir: “Taxta materiallarının idxalı müəyyən dövr ərzində dayanır, qiymətlər bahalaşır. Yaxud bazara o qədər material daxil olur ki, bu da qiymətləri ucuzlaşdırır. Cari il ərzində bir neçə dəfə taxta materialları qiymətlərinin qalxıb-enməsi müşahidə olundu. Məlumdur ki, Rusiya - Ukrayna müharibəsi başlayandan sonra bir müddət hər iki ölkədən tikinti materialların idxalı mümkün olmadı. Rusiyaya tətbiq olunan sanksiyalar isə bu vəziyyəti daha da gərginləşdirdi. Ancaq daha sonra məlum problem aradan qalxdı və yenidən ölkəyə tikinti materialları daxil olmağa başladı.Məlumat üçün deyim ki, ötən il bir kub-metri 450 manat olan taxtanın qiyməti hazırda 280 - 250 manata qədər ucuzlaşıb. Xaricdən idxal olunan materiallarda qiymətləri tənzimləmək olmur, yəni birdən-birə ya kəskin ucuzlaşır, ya da bahalaşır. Ancaq yerli materiallarda ötən illə müqayisədə cüzi bahalaşma müşahidə olunur. Ümumiyyətlə, bazarda bolluq yaranan zaman satıcılar materialları maya dəyərindən də aşağı qiymətə satmağa məcbur olurlar. Bu il həm də bazarda əvvəlki illərlə nisbətdə bir qədər alıcı qıtlığı hiss olundu. Ona görə ki, qiymətlər ucuzdur”.
Ekspert onu da əlavə etdi ki, Rusiyadan idxal olunan dəmir məmulatları xeyli ucuzlaşıb: “Bu da onunla bağlıdır ki, ölkəmizdə də istehsal olunan bu materialların maya dəyəri ucuz başa gəldiyi üçün, idxalın qiymətində endirimlər edildi. Daxili istehsal olan dam örtükləri və kirəmitlərdə qiymətlər əsasən stabildir. Artıq yerli məhsul bazarda özünə yer etməyə başlayıb, hətta böyük paya malik olub. 1 kv-metrlik dam örtüyünün qiyməti təxminən 6-7 manata təklif olunur. Bu qiymət bəzən 4 manata qədər düşə bilir. Xarici məhsullar isə bir qədər bahadır, yəni 10-12 manata qədərdir. Ən bahalı örtüklər isə Finlandiya istehsalı olan dam örtüklərində müşahidə olunur. Qiymətlər əsasən millimetrə görə dəyişir, yəni 0.21mm-dən 0,50 mm, hətta 100 mm-ə qədər dam örtükləri var. Ən qalın örtüklər isə 0.38-0.45 mm olmalıdır”.
Günel CƏLİLOVA
