Rusiyanın iri bankları öz bankomatları vasitəsilə əhalidən dollar və avro qəbul etməyi dayandırıblar. Bu barədə “İzvestiya” qəzeti yazıb. Nəşr müəyyən edib ki, ölkədə sistem əhəmiyyətli 13 kredit təşkilatından 11-i belə imkan vermir.
Eyni zamanda, demək olar ki, bütün banklar Qərb valyutasının qəbulunu niyə dayandırdıqları barədə məlumat verməyib. Yalnız bir bank izah edib ki, ona qarşı xarici sanksiyaların tətbiqindən sonra bunu dayandırdılar.
Ekspertlərin fikrincə, bu cür hərəkətlər onunla bağlıdır ki, demək olar, bütün sistem əhəmiyyətli Rusiya kredit təşkilatları hazırda Qərb sanksiyalarına məruz qalır və onların xarici banklardakı dollar və avrodakı müxbir hesabları dondurulur. Bundan əlavə, bankomatlar vasitəsilə dollar və avro qəbulundan imtina əhalinin bu xidmətə tələbatının ümumi azalması ilə əlaqələndirilə bilər.
Xatırladaq ki, bir ay əvvəl Rusiya bankları dollar və avronun məzənnəsini kəskin qaldırıb.
Qeyd edək ki, bu qərar Rusiyada çalışan insanlar üçün çətinlik yaradacaq. Belə ki, qazanclarını rus rublu ilə alan işçi qüvvəsinin əksəriyyəti pulu xarici valyutaya (ABŞ dolları, Avro) çevirərək, yaşadıqları vilayətlərə yollayırlar.
"Bizim soydaşlarımızın da qazancı rublla həyata keçir, onlar sonradan rublu alıb, avro və dollara çevirib öz ailələrinə göndərirlər, bununla bağlı da problemlər yaşanır"
Bank sahəsi üzrə ekspert Əkrəm Həsənov "Bakı-Xəbər"ə açıqlamasında qeyd etdi ki, Rusiyada valyuta satışına hər zaman məhdudiyyət olub: "Yeni qərar, əsasən texniki məsələ ilə bağlıdır. Bankomat vətəndaşlardan dollar qəbul etməyəcək. Rusiya hökuməti bankomatlarda xarici valyuta saxlamaq istəmir. Vətəndaşlar bank vasitəsilə vəsait köçürə bilərlər. Ancaq bu gün Rusiyada pul köçürülməsi ilə bağlı problem yaşanır. Bu səbəbdən də son illər Rusiyada yaşayan azərbaycanlılar xarici valyutanı ölkəyə yollamağın başqa yollarını da öyrəniblər. O da məlumdur ki, rus rublunun məzənnəsi həddindən artıq ucuzlaşıb. Bizim soydaşlarımızın da qazancı rublla həyata keçir. Onlar sonradan rublu alıb, avro və dollara çevirib öz ailələrinə göndərirlər. Bununla bağlı da problemlər yaşanır. Çünki pul inflyasiyaya uğradıqca gəlirlərin həcmi ilə bağlı problemlər yaranır”.
Günel CƏLİLOVA
