Azərbaycanla Rusiya arasında ticarət dövriyyəsində kəskin artım qeydə alınıb. Azərbaycanın Dövlət Gömrük Komitəsinin məlumatına əsasən, 2023-cü ilin yanvar-iyun aylarında Azərbaycanla Rusiya arasında ticarət dövriyyəsi 2 milyard 164 milyon 562 min dollar təşkil edib. Bu göstərici 2022-ci ilin yanvar-iyun ayları ilə müqayisədə 37,6 faiz çoxdur.
Hesabat dövründə Azərbaycanın ümumi xarici ticarət dövriyyəsinin 8,27 faizi Rusiya ilə ticarət əməliyyatlarının payına düşüb və Rusiya Azərbaycanın üçüncü xarici ticarət tərəfdaşı olub.
Məlumat üçün bildirək ki, bu il Azərbaycan ən çox Rusiyadan mallar idxal edib və idxalda kəskin artım müşahidə olunub. Belə ki, bu ilin 6 ayında Rusiyadan ölkəmizə 1 milyard 543 milyon 428 min dollarlıq məhsullar gətirilib. Bu, 2022-ci ilin eyni dövrü ilə müqayisədə 30,5 faiz çox deməkdir. Bu ilin 6 ayında Azərbaycanın ümumi idxalının 18,83 faizi Rusiyanın payına düşüb.
Qeyd edək ki, Azərbaycanın Rusiyaya ixracında da kəskin artım müşahidə edilib. Cari ilin 6 ayında Azərbaycanın Rusiyaya ixracı 621 milyon 134 min dollar təşkil edib. Bu, 2022-ci ilin yanvar-iyun ayları ilə müqayisədə 59,1 faiz artım deməkdir. Ölkəmizin ümumi ixracının 3,46 faizi Rusiyanın payına düşüb.
Onu da qeyd edək ki, Rusiya Baş nazirinin müavini Aleksey Overçuk bu il Rusiya ilə Azərbaycanın ticarət dövriyyəsini 5 milyard dollara çatdırmağı planlaşdırdığını deyib. Ehtimal edilir ki, bu il Azərbaycanla Rusiya arasında ticarət dövriyyəsi 5 milyard ABŞ dollarına çatacaq.
Maraqlıdır, Rusiya ilə ticarət dövriyyəsində idxal və ixracda kəskin yüksəlişin səbəbi nə ilə bağlıdır?
"Rusiya bazarına Azərbaycan, eynilə Azərbaycan bazarına adıçəkilən ölkənin məhsullarının çıxarılması ticarət dövriyyəsinin həcminin artmasına şərait yaradır"
İqtisadçı ekspert Kamran Məmmədli "Bakı-Xəbər"ə açıqlamasında qeyd etdi ki, Azərbaycanla Rusiya arasında ticarət dövriyyəsində kəskin artım bir sıra amillərlə bağlıdır: "Pandemiya dövründə dünya iqtisadiyyatında azalmalar baş verib. 2022-ci il isə pandemiyadan sonrakı bərpa dövrüdür və kifayət qədər dünya iqtisadiyyatında artım qeydə alınıb. Azərbaycanla Rusiya arasında ticarət dövriyyəsində kəskin artımın bir səbəbi də geosiyasi gərginliklə bağlıdır: "Ötən dövrdə Azərbaycan Rusiyadan buğda idxalını davam etdirib və bu, ticarət əlaqələrinin artmasına gətirib çıxardıb".
İqtisadçı hesab edir ki, Rusiya və Azərbaycan arasında olan tərəfdaşlıq hər iki ölkənin iqtisadi maraqlarına uyğun gəlir: “Hər iki ölkə arasında olan siyasi, iqtisadi və sosial tərəfdaşlıq olduqca əhəmiyyətlidir. Rusiya bazarına Azərbaycan, eynilə Azərbaycan bazarına adıçəkilən ölkənin məhsullarının çıxarılması ticarət dövriyyəsinin həcminin artmasına şərait yaradır. Azərbaycanın qeyri-neft ixracatının üçdə biri Rusiya bazarına yönəlib. Rusiya bazarına, xüsusən ixrac imkanlarımız da genişlənir. Ona görə də Rusiyadan yalnız idxalı deyil, həm də Rusiyaya ixracı artırmaqla ticarət dövriyyəsinin yüksəlməsinə nail olmaq olar".
Günel CƏLİLOVA
