Azərbaycanda kredit sahəsində problem yaşayanlar sırasında fermerlərin də çoxluq təşkil etməsi heç kimə sirr deyil. Bu hal ölkənin ərzaq təhlükəsizliyinə, məşğulluq durumuna da ciddi təsir etdiyindən, məsələ hökumətin də diqqət mərkəzindədir.
Elə bu məqsədlə Kənd Təsərrüfatı Nazirliyinin nəzdində fəaliyyət göstərən Aqrar Kredit və İnkişaf Agentliyi yaradılıb. Ancaq fermerlər iddia edir ki, Agentlik olsa da, onların kredit problemi həll olunmur. Bu səbəbdən, kredit əlçatalığının təmin edilməsi məqsədilə Aqrar Sənaye Banklarının yaradılması tələb edilir.
Ekspertlər hesab edir ki, kənd təsərrüfatı çox risqli bir fəaliyyətdir. Banklar risqli sahəyə kredit verməyə o qədər də həvəsli olmur. Çünki kreditin geri dönüşündə problemlər yaranır. Bir tərəfdən də kredit götürmək üçün banklara girov lazım olur. Rayonlarda olan daşınmaz əmlakların sənədsiz olması isə krediti almaq üçün sahibkarlara problem yaradır.
Maraqlıdır, ölkədə Aqrar Kredit və İnkişaf Agentliyi olmağına baxmayaraq, əlavə bankın olmasına ehtiyac varmı?
Pərviz Heydərov: "Ölkədə Aqrar Sənaye Banklarının yaradılmasına ehtiyac yoxdur, çünki..."
İqtisadçı Pərviz Heydərov hesab edir ki, ölkədə Aqrar Sənaye Banklarının yaradılmasına ehtiyac yoxdur: “Söhbət əgər ümumən bank sektorunda kreditlərə, vəsaitlərə əlçatanlığın problem olmasından gedirsə, yeni bir qurumun, yeni bankın təşkilinin bu sahədə hansı müsbət rol oynayacağı sual altındadır. İndiki halda ölkədə 25 bank fəaliyyət göstərirsə, fermerlərin, kənd təsərrüfatı ilə məşğul olan şəxslərin bu banklardan kredit əldə etmək çətinlikləri varsa, bu bankın yaradılması hansı müsbət rol oynaya bilər, bu hansı yeni bir mexanizm əsasında həyata keçirləcək? Belə çıxır ki, yenə dövlətin üzərinə yük düşəcək. Ona görə də mən bankın yaradılmasına ehtiyac görmürəm”.
Kamran Məmmədli: "Etibarlı girov tələbi aradan qaldırılmalı və bunu rayonlarda fəaliyyət göstərən fermerlərdən tələb etmək məsələsi qoyulmalıdır"
İqtisadçı Kamran Məmmədli "Bakı-Xəbər"ə açıqlamasında qeyd etdi ki, etibarlı girov tələbi aradan qaldırılmalı və bunu rayonlarda fəaliyyət göstərən fermerlərdən tələb etmək məsələsi qoyulmalıdır: "Əslində, kənd təsərrüfatı ilə məşğul olan əhalinin əkib-becərdiyi torpaq sahəsi girov kimi götürülə bilər. Belə ki, fermer bu torpağı girov kimi göstərərək istədiyi məbləğdə kredit əldə edə bilər. Gələcəkdə bank da həmin torpaqlar hesabına özünün fermer təsərrüfatını yarada, yaxud da sata bilər. Kreditin faiz dərəcəsi də aşağı salınmalı və maksimum 5 faiz həddində olmalıdır. Faiz dərəcələri nə qədər aşağı olarsa, bir o qədər də aqrar sahənin inkişafına nail ola bilərik”.
Günel CƏLİLOVA
