Zəngilan rayonunun Ağalı kəndinə qayıdışın təmin olunması Azərbaycanın siyasi gücünün, iradəsinin, ağıllı siyasətinin nəticəsidir. Ermənistanın viran qoyduğu Ağalıda bir ildir ki, yaşayış var və bu “Ağıllı kənd” dünyanın diqqət mərkəzindədir. Azərbaycan dövləti Ağalı kəndini yenidən qurdu və burada həyatı canlandırdı.
Həm Ağalıda, həm də digər azad ərazilərimizdə kifayət qədər alternativ enerji mənbələri var. Vurğulayaq ki, kənddə enerjiyə tələbat alternativ enerji mənbələri vasitəsilə təmin olunur. Bəli, Ağalının enerji təminatı alternativ enerji mənbələri hesabına ödənir. Bu da sübut edir ki, azad olunmuş rayonlar böyük alternativ enerji potensialına malikdir.
“Bu gün dünyanın biznes strukturları regionun alternativ enerji mənbələrinə olduqca ciddi diqqət yetirir”
Liberal İqtisadçılar Mərkəzinin sədri Akif Nəsirli “Bakı-Xəbər”ə şərhində “Ümumiyyətlə, Azərbaycanın işğaldan azad olunmuş əraziləri dağlıq və dağətəyi regionlardır. Bu regionlarda da iti axan dağ çayları, Azərbaycan ümumi iqliminə xarakterik olan günəşli günlərinin çox olması, bunlarla yanaşı isti bulaqların mövcudluğu alternativ enerji mənbəyi kimi dəyərləndirilən resurslardır. Azərbaycana sadəcə bunun dünyaya təbliğ və təqdim edilməsi vacibdir. İşğaldan azad olunmuş ərazilərdə Ağalı kimi bu cür ağıllı sistemlə çalışan layihələrin icra edilməsi ilə bir tərəfdən Ermənistanın o əraziləri 30 il işğalda saxlamasının alternativi dünyaya təqdim olunur. O mənada alternativ təqdim olunur ki, 30 il Ermənistan işğalda saxladığı torpaqda yad torpaqları olduğu üçün yaşayış məntəqələrini dağıdıb, Azərbaycan isə bu torpaqlar özünə məxsus olduğuna görə tikinti quruculuq işləri aparır, əraziləri bərpa edir. Bununla yanaşı, bu imkandan istifadə edib həmin yaşayış məntəqələrini haqlı və doğru olaraq mümkün qədər alternativ enerji ilə təmin etməklə həm də dünyaya bir çağırış edir. Yəni bizim işğaldan azad olunmuş ərazilərimiz həm də ucuz başa gələn alternativ enerji mənbələri ilə zəngindir. Bu da azad ərazilərimizin bərpasına dünyanın diqqətini çəkməkdə önəmli məqamlardan biridir”-deyə bildirdi.
A.Nəsirli qeyd etdi ki, Azərbaycan hökuməti yalnız Ağalı kəndində deyil, bütövlükdə bu ərazilərdə çox sayda iri və xırda su elektrik stansiyaları, günəş enerjisi panelləri quraşdırıb və quraşdırmaqda da davam edir. “Alternativ və bərpa olunan enerji sektorunun inkişafı məsələsi dünyanın diqqət mərkəzində olduğuna görə bu amil bizim ərazilərə yerli və xarici biznesin marağının artmasına kömək edəcək. Yəni bu gün dünyanın biznes strukturları regionun alternativ enerji mənbələrinə olduqca ciddi diqqət yetirir. Çünki indi artıq dünyada bütün beynəlxalq təşkilatlar ölkələrə, onların şirkətlərinə karbon emissiyasının aşağı salınması tapşırıqları verib. Bu tapşırıqların da yerinə yetirilməsi, icra olunması üçün alternativ enerji mənbəyi olan regionlar diqqət mərkəzindədir. Biz də hökumət olaraq işğaldan azad olunmuş ərazilərdə bu potensialın olduğunu Ağalı kəndinin, eləcə də digər ağıllı şəhər və kəndlərimizin timsalında dünyaya nümayiş etdiririk. Fikrimcə, yaxın illərdə bunun nəticələri görünəcək” - deyə A.Nəsirli əlavə etdi.
İradə SARIYEVA
