Türk Fondunun yaradılması prosesi başa çatır. Bunu Türk Dövlətləri Təşkilatının baş katibi Bağdad Amreyev Qarabağ regionunun bərpası və inkişafına həsr olunmuş Şuşa Türk Biznes Forumunda deyib.
O, noyabrda bu fondla bağlı müvafiq sənədin imzalanmasının gözlənildiyini bildirib: “Bu vəsait kiçik və orta biznesin inkişafına, infrastrukturun yaradılmasına yönəldiləcək. Qarabağın bərpası da onun əsas prioriteti olacaq. 2023-cü ilin yanvarından bu fond öz fəaliyyətinə başlayacaq və bizim iştirakçı ölkələrin maliyyə strukturları ilə əməkdaşlığı genişlənəcək”.
Qeyd edək ki, Ortaq Türk İnvestisiya Fondunun yaradılması ideyası Qazaxıstanın keçmiş prezidenti Nursultan Nazarbayev tərəfindən 2015-ci ildə irəli sürülüb. Belə ki, 2021-ci ilin sentyabr ayında Bakıda keçirilən Türkdilli Dövlətlərin Əməkdaşlıq Şurasına üzv ölkələrin iqtisadiyyat nazirlərinin 10-cu görüşü çərçivəsində Türk İnvestisiya Fondunun yaradılması ilə bağlı qərar verilib. Fondun yaradılmasında məqsəd üzv ölkələrdə infrastrukturun inkişaf etdirilməsi, biznesin maliyyələşdirilməsi və investisiya layihələrindəki maliyyə çatışmazlığı ilə bağlı maneələrin aradan qaldırılması naminə əlavə resursların səfərbər edilməsidir.
Maraqlıdır, Türk dövlətlərinin qarşılıqlı əməkdaşlığının sürətlə dərinləşdiyi indiki dövrdə Türk İnvestisiya Fondunun yaradılması hansı perspektivlər vəd edir? Belə bir Fondun yaradılması orta türk valyutasına keçid üçün zəmin ola bilərmi?
“Fondun formalaşması türk dövlətləri arasında əlaqələrin daha da dərinləşməsinə xidmət edir”
Millət vəkili Vüqar Bayramov bildirdi ki, fondun yaradılması ilə türk dövlətlərinə daha çox investisiya cəlb ediləcək: “Türkiyə investisiya fondunun yaradılması türk dövlətləri təşkilatının əsas məqsədlərindən biridir. Bununla bağlı artıq razılaşma var və fondun formalaşması türk dövlətlərinə daha çox investisiyanın cəlb olunmasına imkan yaradacaq. Fondun formalaşması türk dövlətləri arasında əlaqələrin daha da dərinləşməsinə xidmət edir. İşğaldan azad olunmuş ərazilərimizdə türk dövlətlərinin investisiya qoyuluşunun genişləndirilməsi əsas hədəflərdəndir. Nəzərə alsaq ki, artıq yalnız Türkiyə deyil, digər türk dövlətləri də Qarabağ və Şərqi Zəngəzura investisiya qoyuluşunda maraqlı olduğunu bəyan ediblər. Bununla bağlı birmənalı şəkildə müraciətlər də var və bütün bunlar ondan xəbər verir ki, həm fondun formalaşması, həm indiki dövrdə əlaqələrin genişləndirilməsi praktik olaraq daha çox sərmayənin cəlb edilməsinə imkan verəcək. Bu, bir tərəfdən türk dövlətləri arasında münasibətlərin daha da dərinləşməsinə və inkişaf etməsinə, eyni zamanda, işğaldan azad olunmuş ərazilərimizdə türk dövlətlərini təmsil edən şirkətlərin payının artmasına gətirib çıxaracaq. Bu baxımdan həm yeni fondun formalaşması, həm münasibətlərin inkişafı ilə bağlı aparılan sistemli və hədəfli, strateji yanaşmalar, münasibətlər və dövlətlərarası münasibətlərin daha da dərinləşməsi ölkələrin iqtisadi inkişafına müsbət təsir göstərəcək. Sözsüz ki, Qarabağ və Şərqi Zəngəzurun bərpa, yenidənqurma və iqtisadiyyatın formalaşması prosesinə də xüsusi töhfə verəcək".
Günel CƏLİLOVA
