Rayonlarda kartof-soğan əllərdə qalıb, Bakıda qiymət düşmür, Kənd Təsərrüfat Nazirliyi suçlanır...

Natiq Cəfərli: “Problemin əsas səbəbi məhsulların birbaşa çatdırılması ilə bağlıdır”

img

Şəhərdə məskunlaşan insanlar təbii məhsulların əldə edilməsində həm qiymət, həm də keyfiyyət baxımından müəyyən çətinliklərlə üzləşirlər. Bu yöndə aparılan ən başlıca işlərdən biri də fermer istehsalı olan məhsulların bir əldən istehlakıdır. Məlumata görə, bölgələrdə kartof və soğan xeyli ucuzlaşıb. Alıcı olmadığından məhsul sahələrdə qalıb.

Son günlər sosial şəbəkədə kəndlilərin məlum məsələ ilə bağlı narazılığı yayılıb. Fermerlər qeyd edir ki, kartof və soğanın qiyməti hazırda kənd yerində çox ucuzdur. Alverçi həmin məhsulu kəndlidən ucuz qiymətə alıb, bazarda baha qiymətə satır.

Qeyd edək ki, Kənd Təsərrüfatı Nazirliyi tərəfindən Bakı və Abşeronda “Kənddən şəhərə” yarmarkaları keçirilsə də, qiymətlərdə dəyişiklik hiss olunmur. Yəni paytaxt və Abşeron bazarlarında qiymət aztəminatlı ailələrin büdcəsinə görə deyil.

Ekspertlər bildirir ki, ölkəmizdə satışa çıxarılan məhsullar bir çox hallarda olduqca yüksək qiymətə təqdim edilir. Hər şey maya dəyərinə görə hesablanır.

  • “Fermerlər öz məhsullarını daha ucuz satmağa məcbur olur, Bakıda isə qiymətlər düşmür”

Məsələ ilə bağlı fikir bildirən iqtisadçı Natiq Cəfərli qeyd etdi ki, problemin əsas səbəbi məhsulların birbaşa çatdırılması ilə bağlıdır: “Bir müddət əvvəl  Azərbaycan hökuməti ”tarladan süfrəyə konsepsiyası"nı qəbul etmişdi, lakin bunu reallaşdıra bilmir. Yəni elə bir sxem qurulmalıdır ki, mal və məhsulların tarladan süfrəyə, fermerlərdən əhaliyə çatdırılması daha asanlaşsın və fermerlərə rahat olsun. Fermerlər hər gün yığdıqları məhsulu gətirib bazarda sata  bilməz və bu fiziki olaraq da mümkün deyil, həmçinin xərc də tələb edir. Gündə hər bir fermer kənddən 3-5 yeşik meyvə-tərəvəz yığırsa, onu hər dəfə gətirib sata bilmir. Elə bir sistem  qurulmalıdır ki, eyni kənddən olan insanlar növbəlilik prinsipi ilə bazara birbaşa məhsul çıxara bilsin. Bu, əslində heç çətin bir şey də deyil. Kifayət qədər asanlıqla bu sistemi  qurmaq mümkündür, lakin təəssüf ki, hələ də bu qurulmayıb. Nəticədə fermerlər öz məhsullarını daha ucuz satmağa məcbur olur, Bakıda isə qiymətlər düşmür. Hesab edirəm ki, təcili surətdə “tarladan süfrəyə” sisteminə ehtiyac var".

Günel CƏLİLOVA

Peşə etikası

Son xəbərlər