Nazirlər Kabineti “Satışı əlavə dəyər vergisindən azad olunan heyvandarlıq və quşçuluq təsərrüfatlarında istifadə edilən yem və yem əlavələrinin Siyahısı”nı təsdiq edib. Bununla bağlı Baş nazir Əli Əsədov qərar imzalayıb.
Qərara əsasən, yem və yem əlavələrinin təsnifatı ilə bağlı hüquqi baza yaradılıb. Bu, ölkədə yem məhsulları bazarının inkişafı baxımından mühüm əhəmiyyət kəsb edir. Belə ki, 72 növdə yem və yem əlavələrinin istehsalı və satışı ilə məşğul olan biznes subyektlərinə münasibətdə vergi inzibatçılığı asanlaşdırılmış olub. Bununla da çoxsaylı bazar subyektləri 72 növdə məhsulun (yem və yem əlavələrinin) istehsalı və satışı üzrə tətbiq olunan vergi güzəştlərindən bəhrələnmiş olur.
Maraqlıdır, yem və yem əlavələrinin ƏDV-dən azad edilməsi süd, yumurta və ət qiymətlərinə necə təsir göstərə bilər?
“Yem və yem əlavələrinin kənd təsərrüfatı məhsullarının, heyvandarlıq və quşçuluq məhsullarının qiymətlərinə təsiri böyükdür”
İqtisadçı Fuad İbrahimov bildirdi ki, kənd təsərrüfatı, xüsusən heyvandarlıq və quşçuluq sahələrinin inkişafı ilə bağlı dövlət, hökumət tərəfindən çoxsaylı addımlar atılıb:
“Bu sahələrin genişlənməsi, tərəqqisi üçün xeyli güzəştlər tətbiq olunur, stimullaşdırıcı qərarlar qəbul edilir. Əlbəttə, bunlar çox önəmlidir. Dövlətin məqsədi kənd təsərrüfatının bütün sahələrinin inkişafına nail olmaqdır. Problem ondadır ki, çox vaxt dövlətin öz rüsumlarından imtina etməsi, kənd təsərrüfatı sahələrinin inkişafı istiqamətində atdığı addımlar, tətbiq olunan güzəştlər istənilən nəticəni vermir. Ən azından əgər bu vergi güzəştləri kənd təsərrüfatı sahəsində qiymətlərin nisbətən aşağı düşməsinə səbəb olmalıdırsa, biz bunu müşahidə etmirik”.
Ekspert hesab edir ki, yem və yem əlavələrinin kənd təsərrüfatı məhsullarının, heyvandarlıq və quşçuluq məhsullarının qiymətlərinə təsiri böyükdür: “Yaxşı olar ki, biz də ölkəmizdə bu cür güzəştlərin, dəstək addımlarının effektini görək. Quşçuluğun inkişafını, sahibkarlara edilən güzəştlərin müsbət təsirini o vaxt görmək mümkün olar ki, bazarda toyuğun qiyməti 6 manatdan 4 manata düşsün. İqtisadiyyat Nazirliyi yanında Antiinhisar Xidməti sahibkarlara göstərilən diqqət və qayğının, verilən maliyyə dəstəyinin, vergi və rüsumlarla bağlı güzəştlərin hansı nəticələr verdiyini araşdırmalıdır. Proses nəzarətdə olmalıdır. Yəni sadəcə sahibkarlar deyil, onların məhsullarını istifadə edən istehlakçılar da bu qərarlardan yararlanmalıdır. Heyvandarlıq və quşçuluqda yemlərin idxalında 18 faiz əlavə dəyər vergisinin aradan qaldırılması o deməkdir ki, ət və süd məhsullarının qiymətində ucuzlaşma olmalıdır”.
Günel CƏLİLOVA
